Суоттулар субуотунньуктаатылар

Уус Алдан улууһугар Суоттуга, сыллата бу кэмнэргэ ыытыллар олохсуйбут үтүө үгэс баар.

Ол курдук, тыыл бэтэрээннэригэр, сэрии тулаайахтарыгар, байыаннай дьайыы кыттыылаахтарын дьиэ кэргэттэригэр уонна 1 гр. инбэлииттэргэ оттук мас бэлэмнээн тэлгэһэлэригэр тиэрдэн биэрэргэ субуотунньук ыытыллар. Маннык тэрээһиннэр нэһилиэкпитигэр биир саамай элбэх киһини хабар көхтөөх үлэ бырааһынньыгын быһыытынан ыытыллаллара кэрэхсэнэр. Бу олус кэтэһиилээх уонна улахан көмөлөөх үлэни нэһилиэкпит дьаһалтата, баһылыкпыт Иванов В И., социальнай харалта үлэһиттэрэ Тарасова Т.И., Алексеева З.А сүрүннээн тэрийэллэр. Тыаттан маһы ИП Прудецкай Д.Н. киллэрдэ.

Субуотунньукка нэһилиэк бары тэрилтэлэрэ көхтөөх кыттыыны ыллылар. Ол курдук, ОДьКХ сал. Черкашин Н.Н., баһаарынай чаас  сал. Местников Н.Н, «Лена» ТХПК сал. Черкашин М.А., «Туйма» ТХПК сал. Мухин В.П., Суотту орто оскуолатын үөрэнээччилэрэ уонна учууталлара, сал. Петухова И.М., Хоноҕор оскуолата  сал. Александрова Е.И., «КУСТУК» оҕону сайыннарар киин, сал. Спиридонова М.Н., Суоттутааҕы «Доҕордоһуу» түмэл кэлэктиибэ, сал. Новоприезжая Н.Я., Уус Алданнааҕы техникум устудьуоннара уонна преподавателлэрэ, сал. Стрекаловскай А.В., нэһилиэкпит «Мичээр» уонна «Түһүлгэ» сынньалаҥ кииннэрэ, сал. Патрасова В.В., «Спецсервис» ХЭУо. сал Павлов Е.В. кыттан күүрээннээх үлэ ыытылынна. Быйылгы оттук мас бэлэмигэр нэһилиэкпитигэр тэриллибит Мухин В.С. салайааччылаах аҕалар түмсүүлэрэ көхтөөхтүк кыттыбыттара кэрэхсэбиллээх.

Үлэһиттэр эбиэттэригэр И.И. Парников буһарбыт эт уонна ис миинин тото хана истилэр. Заровняев И.Т., Татаринов И.С., Черкашин М.А., Белолюбскай А.Е., Константинов А.А., Добрецов Г.Г., Черкашин Уо.Н., Бубякин С.П. тыраахтардарынан оттук маһы тустаах дьоҥҥо тиэйдилэр. Күүрээннээх үлэ түмүгүнэн отут ыалга оттук мас тиэллэн, дьон-сэргэ барҕа махталларын тиэртилэр. Нэһилиэнньэҕэ улахан суолталаах, көмөлөөх, көхтөөх үлэ инникитин да салҕанан дьону сомоҕолуу турдун диэн баҕа санааларын биллэрдилэр.

Раиса Черкашина,

Суотту, Уус Алдан.

Хаартыскаларга Е.И.Свинобоева , В.И.Гоголев түһэриилэрэ.