Сургуулук уола Кыһыл болуоссакка Кыайыы параадыгар кытынна

Саха сириттэн сылдьар Алексей Тарасов Улуу Кыайыы күнүгэр Москваҕа Кыһыл болуоссакка байыаннай параадка кыттыыны ылла.

Бу суолталаах тэрээһиҥҥэ кыттыытын туһунан Алексей Тарасов санаатын маннык үллэһиннэ:
— Байыаннай дьайыыга кытта сылдьар саха уолаттарыттан Кыһыл болуоссакка байыаннай параадка кыттааччы бастакы буолуом эрээри,  урукку сылларга  Саха сириттэн бу суолталаах тэрээһиҥҥэ  кыттыбыт эдэр дьон мин иннибинэ эмиэ бааллара. Параакка кытта кэлиэхпит иннинэ Ростов-на-Дону  анал бэлэми ааспыппыт. Онтон икки нэдиэлэ устата Москваҕа кэлэн бэлэмнэммиппит. Бүгүн дойду киин куоратыгар -3 кыраадыс тымныы, тыаллаах. Ол эрээри мин тымныы дойдуттан — Саха сириттэн сылдьар, бары да байыаннай дьон буолан, араас түгэннэргэ бэлэммит быһыытынан, сорукпутун чиэстээхтик толордубут. Биллэн турар, улуу полководец Михаил Кутузов аатынан Кыһыл Знамялаах 150-с гвардейскай дивизияҕа баарым миэхэ улахан чиэс уонна бочуот. Байыаннай параадка кыттыы — биһиги сэриигэ сылдьыбыт  өбүгэлэрбитин кэриэстээһин, чиэстээһин умнуллубат түгэнэ. Ол да иһин бары бу суолталаах тэрээһиҥҥэ өрө көтөҕүллэн сырыттыбыт.