Ааптар хаартыскаҕа түһэриитэ
Алтынньы 6 күнүгэр Саха сирин Суруйааччыларын сойууһун биэс сылга биирдэ ыытыллар 18-с сийиэһэ үлэтин саҕалаата.
СӨ Бырабыыталыстыбатын Бэрэссэдээтэлин солбуйааччы Сергей Местников сийиэс үлэтигэр кыттыыны ылла.
— Бүгүн, бырабыыталыстыба саҥардыллыбыт састааба үлэтин саҥа саҕалаабыт күнүгэр, суруйааччылар сийиэстэригэр кыттыыбыт бэлиэ түгэн дии саныыбын.
2025 сылга саха суругунан литературатын 125 сылын бэлиэтиэхпит. Бырабыыталыстыба өттүттэн айар сойуустар сайдыыларыгар өйөбүл оҥоһуллар. »Айар» кинигэ кыһатыгар саха классиктарын кинигэлэрэ тахсалларын үбүлээһин улаатта. Сотору кэминэн буолаары турар »Үрүҥ хаар алгыһа» норуоттар икки ардыларынааҕы бэстибээли өйүөхпүт, үрдүк таһымҥа ыытыахпыт диэн эрэллээхпин. Бу бэстибээл өрөспүүбүлүкэ тас өттүгэр духуобунай-култуурунай сибээстэрин бөҕөргөтөргө улахан суолталаах, — диэн бэлиэтээтэ.
Култуура, духуобунай сайдыы миниистирин быһыытынан үлэтин саҕалаабыт Афанасий Ноев суруйааччыларга махтанна.
— Саха Өрөспүүбүлүкэтин 100 сылыгар Суруйааччылар сойуустара Алампа айымньыларын антологиятын 32 тылынан тылбаастаан таһаарбытыгар, бу сүҥкэн суолталаах үлэ иһин бырабыыталыстыба, култуура, ускуустуба диэйэтэллэрин ааттарыттан махталбын тиэрдэбин! Суруйааччылар, эһиги норуот тылын-өһүн, өйүн-санаатын, духуобунай баайын илдьэ сылдьар, тарҕатар, байытар күүс буолаҕыт. Саха суругунан литературатын 125 сылын көрсө бииргэ үлэлэһиэхпит диэн эрэннэрэбин. »Үрүҥ хаар алгыһа» бэстибээли уонна эдэр суруйааччылары кытта үлэни өйүөхпүт, — диэн Афанасий Иванович эттэ.
Бу кэнниттэн »Саха сирин суруйааччылара» ассоциация бэрэссэдээтэлэ Олег Сидоров тыл этиитигэр Арассыыйаҕа уонна тас дойдуларга үлэҕэ тохтоото, ханнык бэлиэ түгэннэр буолбуттарын, туох үлэ ыытыллыбытын кэпсээтэ. Салгыы Саха сирин суруйааччыларын сойууһун бырабылыанньатын бэрэссэдээтэлэ Наталья Харлампьева чаас аҥаардаах дакылаат оҥордо. Кини бу ааспыт 5 сыл уустук түгэннэри үөскэппитигэр, туох үлэ ыытыллыбытыгар, литератураҕа ханнык сүүрээннэр, туох ситиһиилэр, итэҕэстэр баалларыгар, о.д.а. тохтоото.
Бүгүн суруйааччылар сийиэстэригэр бырабылыанньа саҥа састааба талыллыаҕа, устаапка уларыйыылары киллэриэхтэрэ, резолюция ылыллыаҕа.
Нэдиэлэ устата барбыт Бүтүн Арассыыйатааҕы “Сыл учуутала-2024” күрэс Саха сиринээҕи түһүмэҕэ түмүктэннэ. Үөрүүлээх быһыыга-майгыга лауреаттар,…
“Бары бииргэ Кыайыыга!” 1-кы Өрөспүүбүлүкэтээҕи байыаннай-патриотическай пуорумҥа “Покров и защита” уордьанынан Афганскай сэрии бэтэрээнэ Валерий…
«Сахафильм» устуудьуйата уонна СӨ Национальнай бибилэтиэкэтэ «Киинэни ааҕабыт!» бырайыагы үлэлэттилэр . Ол курдук, Саха сирин…
Дьокуускайга полиция сулууспата сокуоннайа суох арыгы атыылааччылары буларга туһуламмыт рейдэлэри салгыы ыытар. Ол курдук, сокуоннайа…
Арассыыйа бырабыыталыстыбата 15 эрэгийиэҥҥэ, ол иһигэр Саха сиригэр, тыа хаһаайыстыбатын сирдэрин оҥорууга үлэ ороскуотун толуйуу…
Былырыын 2023 сыллаахха Былатыан Ойуунускай төрөөбүтэ 130 сылынан Чөркөөххө “Хомуур олоҥхо” түһүлгэ тэриллибитэ. Бырайыак ааптарынан…