Хаартысканы Туйаара Павлова тиксэрдэ
Аҕа дойдуну көмүскээччи күнүн көрсө Саха сирин Суруйааччыларын сойууһа «Саллаакка, боотурга, көмүскээччигэ / Солдату, воину, защитнику» диэн ааттаах патриоттыы тыыннаах хоһоон хомуурунньугун икки тылынан таһаарда. Хомуурунньугу Саха сирин Суруйааччыларын сойууһун бэрэссэдээтэлин солбуйааччы, поэт Рустам Каженкин түмэн оҥорбут. Кинигэ таһын ойуутугар Россия ойуулуур-дьүһүннүүр академиятын чилиэн-кэрэспэдьиэнэ Дьулустаан Бойтунов үлэтэ туһанылынна.
Саха норуодунай поэта Наталья Харлампьева аан тылыгар: «Саха киһитэ үйэлэр түгэхтэриттэн кэлбит итэҕэлинэн тылга сүгүрүйэр, тылы өрө тутар, тыл күүһүгэр эрэнэр. Бүгүҥҥү да ыччат кырыыс тыла, алгыс тыла диэн икки ардын араарар. Алгыс тылынан бөҕөргөтүнэр, күүс эбинэр, кыаҕырар. Ол да иһин Саха сирин суруйааччыларын сойууһа бу кыра кинигэни хомуйан оҥордо. Манна эйэ уонна сэрии, таптал уонна арахсыы, дойдуга бэринии уонна иэһи толоруу тунунан ырыалар, хоһооннор киирдилэр», – диэн хомуурунньук суолтатын, аналын олус сөпкө бэлиэтиир.
Бу көрдөххө дьоҕус кинигэ Өксөкүлээх Өлөксөйтөн саҕалаан киһи сүргэтин көтөҕөр саха поэттарын, ол иһигэр аныгы хоһоонньуттарын түмтэ. Нууччалыы өттүгэр Василий Лебедев-Кумач «Священная война», Михаил Исаковскай «Катюша», Расул Гамзатов «Журавли» курдук аар саарга аатырбыт айымньылара, ону тэҥэ Анал байыаннай дьайыыны илэ харахтарынан билбит Саха сирин ааптардара Анатолий Храмов уонна Анатолий Слепцов хоһоонноро киирдилэр.
Саха сирин Суруйааччыларын сойууһа бу хомуурунньугу байыаннай дьайыы инники кирбиитигэр ытык иэстэрин толоро сылдьар Саха сирин боотурдарыгар тиэрдэр былааннаах. Саха сирин Суруйааччыларын сойууһун бэрэссэдээтэлэ Гаврил Андросов: «Инники кирбиигэ Аҕа дойдуларын көмүскүү сылдьар биир дойдулаахтарбытыгар ботуруону сэргэ, сүргэлэрин көтөҕөр, тирэх буолар уран тыл күүһэ эмиэ ирдэнэр. Бу хомуурунньук Саха сирин боотурдарыгар араҥаччы буоларыгар баҕарабыт», – диир уонна туһааннаах тэрилтэлэр бу кинигэ байыастар тиийиитигэр көмөлөһөллөрүгэр эрэнэрин биллэрэр.
Туйаара Павлова
Бүгүн, ахсынньы 17 күнүгэр, Дьокуускайга 1–5-с кылаас үөрэнээччилэригэр актированнай күн биллэрилиннэ. Бу туһунан киин куорат…
Ахсынньы 13-15 күннэригэр Москва куоракка «Твой Ход – 2025» Бүтүн Арассыыйатааҕы устудьуоннар пуорумнара ыытылларынан, «Сыл…
Дьокуускайга административнай дьиэҕэ тахсыбыт киһи өлүүлээх баһаар холуобунай дьыалатыгар бириигэбэри таһаардылар. Бу туһунан ахсынньы 16…
Бүгүн, ахсынньы 16 күнүгэр, Дьокуускайга Российскай Федерация бочуоттаах полярнигын Николай Находкин «Санников сиригэр эспэдииссийэ» диэн…
Өрөспүүбүлүкэ агробырамыысыланнай комплексын 2025 сыллааҕы үлэтин түмүктүүр мунньаҕар бастыҥ муниципальнай оройуоннар бэлиэтэннилэр. Бу туһунан СӨ…
Тымныыттан эчэйии үксэ арыгы иһииттэн тахсар диэн Өрөспүүбүлүкэтээҕи 2 №-дээх балыыһатын - Суһал мэдиссиинэ көмөтүн…