Суруйааччылар биир дойдулаахтарыгар «Умсулҕаннаах ааҕыыны» тэрийдилэр

Ахсынньы 8 күнүгэр Үөһээ Бүлүү улууһун Өргүөт бибилэтиэкэтигэр Вера Спиридоновна Нанова-Солдатованы кытары истиҥ-иһирэх көрсүһүү буолла.

Ол курдук, оҕо кыра сааһыттан ийэ тыл сүмэтин, кэрэтин иҥэринэн, санаатын сааһылаан этэр, саҥарар дьоҕурун сайыннарар сыаллаах 3 түһүмэхтээх «Умсулҕаннаах ааҕыы» күрэхтэһии долгутуулаах түмүгүн билиннэ. Тэрээһини Өргүөттэн төрүттээх киэн туттар биир дойдулаахтарбыт, төрөөбүт дойдуларын кэрэ айылҕатын, үтүө-мааны дьонун-сэргэтин күндүтүк ахтан-санаан, хоһуйан, кинигэ сырдык илииһигэр тиспит суруйааччыларбыт: Арассыыйа Суруналыыстарын сойууһун, СӨ Суруйааччыларын сойууһун чилиэнэ, СӨ норуотун хаһаайыстыбатын үтүөлээх үлэһитэ, СӨ култууратын туйгуна, Арассыыйа кырдьаҕас историческай куораттарын ассоциациятын бочуоттаах чилиэнэ, Орто Халыма, Үөһээ Бүлүү улуустарын, Өргүөт нэһилиэгин бочуоттаах олохтооҕо, суруйааччы, суруналыыс Вера Спиридоновна Нанова-Солдатова уонна СӨ Суруйааччыларын сойууһун чилиэнэ, үлэ бэтэрээнэ, «Учууталлар учууталлара» бэлиэ хаһаайына, Үөһээ Бүлүү улууһун бочуоттаах олохтооҕо Евдокия Тарасовна Гаврильева көҕүлээн ыыттылар.

Түмүктэр барыбытын үөртүлэр

«Хомоҕой тыллаах ааҕааччы» – Лепчиков Максим, 9 кылаас;
«Бастыҥ олоҥхоһут» – Ноговицын Леня, 7 кылаас;
«Кэскиллээх олоҥхоһут» – Антонова Айыллаана, 2 кылаас;
«Бастыҥ сээркээн сэһэнньит» – Федорова Саша, 5 кылаас;
«Кыайыыга дьулуурун иһин» – Михайлова Ира, 7 кылаас үөрэнээччилэрэ анал ааттары ылар чиэскэ тигистилэр.

Вера Спиридоновна ахсынньы ый аан тумарык тымныытын аахсыбакка, өрөспүүбүлүкэбит киин куората Дьокуускайтан ытык-мааны ыалдьыт буолан көлүөнэлэр ситимнэрин поэзия нөҥүө бөҕөргөтөн, саха киһитин сиэринэн, бэлэх тутуурдаах, кэрэхсэнэр кэһиилээх кэлэн, күрэх көхтөөх кыттааччыларын илии тутуурдаан, өттүк харалаан, истэн, сэргээн, хайҕаан, сүбэ-ама биэрэн, кэлэр кэнэҕэски ыччаппытыгар үтүө тылгын этэн барбыккар ис сүрэхпититтэн махтанабыт. Сырдык санааҥ биһиэхэ холобур буоллун!
Салгыы кэпсээтэххэ, СӨ Наукаларын академиятын Төрөөбүт тылы чинчийэр, харыстыыр уонна сайыннарар киинин салайааччыта, үөрэҕирии билимин доктора Феодосия Васильевна Габышева уонна өрөспүүбүлүкэтээҕи лиссиэй  дириэктэрэ Иван Шамаев төрүт тылбытын сайыннарар сыаллаах сэргэх күрэх ыытылларын сэҥээрэн, өйөөн күрэхтэһээччилэрбитигэр уонна күрэх тэрийээччилэригэр бэйэлэрин хайҕабыл суруктарын, бэлэхтэрин Вера Спиридоновнанан ыыппыттара.
Евдокия Тарасовна оҕолорго кэрэҕэ угуйар, сылаас тыллардаах бэйэтин илиитинэн суруйуулаах кинигэтин бэлэх ууммута олуһун диэн үөртэ, санаабытын өрө көтөхтө!
Күрэхпит тэрийээччилэригэр: “Өргүөт нэһилиэгэ” муниципальнай тэриллии, Трофим Иустинович Петров аатынан Өргүөт орто оскуолатын, Өргүөт модельнай бибилэтиэкэтин уонна Өргүөттээҕи Култуура уонна успуорт комплексын кэлэктииптэригэр тэрээһин үрдүк таһымҥа ааһарын туһугар сыралаах үлэҕит иһин барҕа махталбытын биллэрэбит.
Вера Спиридоновна уонна Евдокия Тарасовна көмөлөрүнэн ыытыллыбыт бүгүҥҥү күрэх Амма Аччыгыйа: «Төрөөбүт тылы таптааһын төрөөбүт норуоту таптааһыны, киниэхэ ис сүрэхтэн бэриниилээх буолууну кытта быстыспат ситимнээх», -– диэн тылларын холобура буолла дии саныыбын.

Анисия ИЛЬИНА