Суруналыыс Николай Крылов анал бириэмийэтэ – олох суолдьута

Бу күннэргэ “Саха сирэ” хаһыат бэтэрээнэ, СӨ Суруналыыстыкаҕа судаарыстыбаннай бириэмийэтин лауреата Николай Крылов Бүлүү улууһун “Олох суола” хаһыат уопсастыбаннай кэрэспэдьиэннэригэр 2024 сыл түмүгүнэн бэйэтин тус бириэмийэтин анаата.

Улахан дьоҥҥо ытык киһи бириэмийэтэ И.М.Гоголев-Кындыл аатынан Бүлүүтээҕи нэһилиэктэр икки ардыларынааҕы кииннэммит бибилэтиэкэ 15 №-дээх Тылгынытааҕы филиалын кылаабынай бибилэтиэкэрэ Виталина Григорьеваҕа ананна.

Виталина Витальевна улуустааҕы “Олох суола” хаһыаты кытта оскуолаҕа үөрэнэр сылларыттан ыкса сибээтээх: хаһыат биир көхтөөх сурутааччыта буоларын ааһан, уопсастыбаннай кэрэспэдьиэн быһыытынан нэһилиэгин сонунун өрүү сырдата олорор. Кини бастакы ыстатыйата 8-с кылааска үөрэнэ сырыттаҕына тахсыбыта. Онтон ыла уопсастыбаннай кэрэспэдьиэн күн бүгүҥҥэ диэри хаһыатын кытта сибээһин быспат. Билигин кини матырыйааллара аны саайтка тахсан, куйаар ситимин нөҥүө биир дойдулаахтарын сэҥээриитин ылар. Виталина Григорьева сүрүн үлэтин уонна айар-суруйар дьарыгын таһынан 2016 сылтан “Тылгыны кийииттэрэ” уопсастыбаннай түмсүүнү салайан үлэлэтэр. Онон көхтөөх уопсастыбанньык күн солото суох киһи.

Кырдьаҕас суруналыыс Николай Крылов  оҕолорго бириэмийэтэ Бүлүү куоратын И.Л. Кондаков аатынан орто оскуола 9 кылааһын үөрэнээччитэ,  “Репортер” медиакиин эрэдээктэригэр Джулианна Дорофееваҕа ананна (сал. К.В. Дорофеева).

Джулианна Н.И. Протопопова аатынан «Кэскил» айар киин куруһуогар 2022 сылтан сылдьар. Медиакиин биир саамай көхтөөх эдэр кэрэспэдьиэнэ. Кини икки тылынан – сахалыы уонна нууччалыы холкутук суруйар. Наада буоллаҕына, оператордаан, монтажердаан да ылыан сөп. Хаартыскаҕа бэйэтэ түһэрэр.  Джулианна Дорофеева матырыйааллара уонна хаартыскалара улуустааҕы «Олох суола», «Кэскил» оҕо хаһыатыгар уонна Н.Е. Мординов-Амма Аччыгыйа аатынан Оҕо бэчээтин кыһатын саайтыгар өрүү бэчээттэнэллэр.

Бүлүү улууһун уонна Бүлүү куоратын Бочуоттаах гражданина, өрөспүүбүлүкэ биллиилээх суруналыыһа, “Саха сирэ” хаһыат бэтэрээнэ Николай Крыловтан бу олус суолталаах бириэмийэлэрин туһунан кэпсииригэр көрдөстүм:

— Төрөөбүт дойдубар тус өйөбүлү оҥорор соруктаах айар үлэһит буоларым быһыытынан 4 бириэмийэни олохтообутум.  Онтон үһэ – оҕолорго, биирэ – улахан дьоҥҥо ананар. Үөрэммит уонна үлэлээбит оскуолабар Бүлүү улууһун Чернышевскай орто оскуолатын биир дойдулааҕым Социалистическай  Yлэ Геройа Семен Митрофанович Васильев аатын иҥэрэр туhунан тыл көтөхпүтүм уонна сүүрэн-көтөн туруорсубутум. СӨ Бэрэсидьиэнин ыйааҕынан  2006  сыллаахха  ахсынньы 26 күнүгэр Чернышевскай орто оскуолатыгар Семен Васильев аата инэриллибитэ.  2005-2006 үөрэх сылыттан  бу оскуола выпускниктарыгар бэйэм ааппынан  истипиэндьийэ анаабытым  үгэскэ кубулуйда.  Ол курдук, бу  истипиэндьийэ үөрэхтэригэр үчүгэй, предметнэй олимпиадалар, научнай-практическай кэмпириэнсийэлэр кыттыылаахтарыгар, бастыҥ уопсастыбанньыктарга туттарыллаллар. Олорбут, учууталлаабыт Чинэкэм үүнэр көлүөнэтигэр дьоһуннаах бэлэҕи оҥорорбор сыл аайы оскуоланы бүтэрээччилэри кытта тэҥҥэ долгуйабын. Бириэмийэбин олохторун суолдьутунан оҥостон, саҥа олох аартыгар үктэнэр оҕолор төрөөбүт оскуолаларыттан куорсун анньынан тахсыылара, биһиэхэ, кинилэр биир дойдулаахтарыгар эмиэ умнуллубуат, олус олгутуулаах түгэн.      

Иккис анал бириэмийэм — төрөөбүт I Күүлэтим оскуолатын бүтэрээччитигэр тапталлаах аҕам, Аҕа дойду Улуу  сэриитин кыттыылааҕа, “Слава” уордьан кавалера Александр Гаврильевич Егоров аатынан. Күндү киһим Сталинград аннынан сэриилэспитэ. Бүлүү улууһун I Күүлэт нэһилиэгин фронтовик Прокопий Алексеевич Павлов аатынан  орто оскуола выпускнигар аҕам Александр Гаврильевич Егоров аныыр истипиэндьйиэм эмиэ олохторун суолдьута буоларыгар эрэнэбин.

Үһүс уонна төрдүс бириэмийэлэрбин сыл аайы тохсунньу 13 күнүгэр Арассыыйа Бэчээтин күнүнэн сибээстээн, олохпун бэчээт эйгэтин сайдыытыгар анаабыт суруналыыс буоларым быһыытынан, улуус хаһыатыгар өрүү суруйар эдэр кэрэспэдьиэҥҥэ уонна уопсастыбаннай селькорга туттарабын, — диэн санаатын үллэһиннэ биллиилээх суруналыыс.

… “Саха сирэ” хаһыат үлэһиттэрэ биһиги ытыктыыр бэтэрээммит, СӨ култууратын үтүөлээх үлэһитэ, суруналыыстыка эйгэтигэр Судаарыстыбаннай бириэмийэ лауреата Өрөспүүбүлүкэ биллиилээх суруналыыһа Николай Крылов анал бириэмийэтин туппут Тылгыны бибилэтиэкэрэ Виталина Григорьеваны уонна эдэр кэрэспэдьиэн Джулианна Дорофееваны итиитик-истиҥник эҕэрдэлиибит уонна айар бөрүөлэрэ сыппаабатыгар баҕарабыт. Убайдаатар убайбыт, саха суруналыыстара ытыктыыр киһибит Николай Александрович Крылов бастыҥ холобура батыһыннарыылаах буоллун!