Суруналыыс «РФ успуорка министиэристибэтин 100 сылынан» бэлиэнэн наҕараадаланна

«Дьулурҕан» хаһыат эрэдээктэрэ, суруналыыс Петр Павлов «РФ успуорка министиэристибэтин 100 сыла» анал түөскэ анньыллар бэлиэнэн наҕараадаланна.

Бэс ыйын 8 күнүгэр биллиилээх судаарыстыбаннай уонна уопсастыбаннай диэйэтэл, Саха сиригэр физическэй култуура уонна успуорт хамсааһынын тэрийээччи, ССРС физическэй култуураҕа туйгуна Николай Николаевич Тарскай төрөөбүтэ 100 сылыгар аналлаах өрөспүүбүлүкэтээҕи ыһыах үөрүүлээх аһыллыытыгар бастыҥнары наҕараадалаатылар. Ол иһигэр ХИФУ иһинэн Устудьуоннарга физическэй иитии уонна сайыннарыы киинин салайааччыта, Бүтүн Арассыыйатааҕы устудьуоннар успуорка Сойуустарын Саха сиринээҕи сэбиэтин бэрэссэдээтэлэ Александр Черкашин «Дьулурҕан» хаһыат эрэдээктэрэ, суруналыыс Петр Павловка «РФ успуорка министиэристибэтин 100 сыла» бэлиэни туттарда.

«Бу наҕараада – успуорду сырдатыыга үлэм сыаната дии саныыбын. Итиэннэ биир дойдулаахтарым, дьонум-сэргэм ортотугар, бары ытыктыыр, сүгүрүйэр киһибит Николай Николаевич Тарскай үбүлүөйдээх тэрээһинигэр туттарыллыбытыттан олус долгуйан туран ис сүрэхпиттэн астынабын», — диэн Петр Павлов иһитиннэрдэ.