Суруналыыстар Саха төрүт бэчээтин күнүнэн наҕараада туттулар

Бүгүн Саха төрүт бэчээтин күнүнэн бырабыыталыстыба дьиэтин Өрөспүүбүлүкэ саалатыгар бэчээт эйгэтин, хаһыат, сурунаал, телевидение үлэһиттэрин эҕэрдэлээтилэр.

Киирии тылы СӨ Бырабыыталыстыбатын Бэрэссэдээтэлэ Кирилл Бычков эттэ.

Билигин 98 судаарыстыбаннай маассабай сириэстибэ тэрилтэтэ баар. Күндү доҕоттор, эһиги бөрүөҕүт хаһан даҕаны сыппаабатын  диэн СӨ Бырабыыталыстыбатын Бэрэссэдээтэлэ Кирилл Бычков мустубут дьоҥҥо эттэ.
Салгыы СӨ Бырабыыталыстыбатын Бэрэссэдээтэлин солбуйааччы Анатолий Семенов баай устуоруйалаах күнүнэн эҕэрдэлээтэ, бырааһынньык от ыйын 1 күнүгэр – «Саха дойдута» сахалыы тылынан бастакы хаһыат 1907 с. тахсыыта, саха чаҕылхай бэрэстэбиитэлэ Василий Васильевич Никифоров- Күлүмнүүр аатын кытары сибээстээҕин бэлиэтээтэ. Өрөспүүбүлүкэни төрүттээбит улуу дьоммут бары төрүт тыл сайдарыгар улахан суолтаны уурбуттарын аҕынна.
Сүрүн тыл этээччилэр кэннилэриттэн Саха төрүт бэчээтин күнүнэн иһитиннэрэр-көрдөрөр маассабай сириэстибэлэр үлэһиттэригэр судаарыстыбаннай наҕараадалары туттарыы үөрүүлээх түгэнэ саҕаланна.

В.В. Никифоров-Күлүмнүүр аатынан суруналыыстыка эйгэтигэр кылаатын иһин судаарыстыбаннай бириэмийэнэн биир идэлээхпит «Кыым» хаһыат кылаабынай эрэдээктэрэ Иван Гаврильев, Оҕо литературатын эйгэтигэр Н.Е. Мординов-Амма Аччыгыйа бириэмийэтин Арассыыйа суруйааччылары сойууһун чилиэнэ Николай Курилов ыллылар.

Биир идэлээхтэрбит «Саха сирэ» хаһыат кэрэспэдьиэнэ Женни Стрюкова уонна СИА аналлаах кэрэспэдьиэнэ Анна Лебединская СӨ Баһылыгын Грамотатын ыллылар. СӨ Баһылыгын Махталынан «Чуораанчык» сурунаал эппиэттиир сэкирэтээрэ Сардаана Матвеева, СИА кылаабынай эрэдээктэрэ Андрей Никифоров, «Саха» НКИХ гендириэктэрин солбуйааччытын э.т. Марианна Тарасова, «УлусМедиа» тэрилтэ кылаабынай эрэдээктэрэ Юлия Филиппова бэлиэтэннилэр. Ил Дархан Махтал суругунан «Айар» кинигэ кыһатын эрэдээксийэтин сэбиэдиссэйэ Надежда Андросова наҕараадаланна. «Ил Түмэн» хаһыат ырытааччыта Раиса Сибирякова СӨ Үтүөлээх суруналыыһа ааты ылла. Оттон «Айар» кинигэ кыһатын оҥорон таһаарыыга отделын сэбиэдиссэйэ Розалия Федотова СӨ Култууратын үтүөлээх үлэһитэ ааты ылла. «Гражданскай килбиэн» бэлиэнэн «Горпечать» тэрилтэ дириэктэрэ Саргылаана Жиркова уонна «Кэскил» хаһыат кылаабынай бухгалтера Наталья Хорунова наҕараадаланнылар.

СӨ Бырабыыталыстыбатын Грамотатынан «Ю.А.Гагарин аатынан өрөспүүбүлүкэтээҕи типография» электромеханика Евгений Никитин, СӨ Бырабыыталыстыбатын Бэрэссэдээтэлин солбуйааччытын Махтал суругунан «Саха» НКИХ «Чохоон» биэриитин эрэдээктэрэ Ньургуйаана Александрова, тыаһы-ууһу оҥорооччу Татьяна Босенко, бырагырааманы ыытааччы Елизавета Прокопьева бэлиэтэннилэр. Ону сэргэ «Сахамедиа» тэрилтэ «Саха сирэ» хаһыат суруналыыһа Ульяна Захарова бэлиэтэннилэр.

Суруналыыстары сэргэ бүгүн эдэр кэрэспэдьиэннэр наҕараадаланнылар. Саалаҕа мустубут аҕа саастаах суруналыыстары 1 №-дээх Нам орто оскуолатын 7-с кылааһын үөрэнээччитэ Иван Гаврильев, 2-с Малдьаҕар орто оскуолатын 9-с кылааһын үөрэнээччитэ Алина Григорьева, Дьокуускай куорат 9-с №-дээх орто оскуолатын 10-с кылааһын үөрэнээччитэ Яна Янушкевич эҕэрдэлээн тыл эттилэр.