Суудунаны кумахтан хостуурга үлэ барар

Бэс ыйын 15 күнүгэр Осетрово пуордуттан Өлүөхүмэҕэ баран испит СК-2026 суудуна кумахха олорон хаалбыта. Ол туһунан тырааныспар, суол хаһаайыстыбатын миниистирин солбуйааччы Семен Коркин кэпсээтэ.

— Киренскэй-Пеледуй аттынан 3063 килэмиэтиргэ уу аалын ыытааччы алҕаһы оҥорон, суудуна кумахха олорон хаалбыта. Кинини таһаарарга 7 суудуна: 3 буксир, 2 устар кыраан, 2 баржа үлэлии тиийдилэр. Билигин суудуна таһаҕаһын сүөкээтилэр. Ол сиргэ уу таһыма 500 см эрэ. Ол эрээри, сыыйа үрдээн эрэрэ бэлиэтэнэр. Бу күннэргэ суудунаны кыайан таһаарбатахтарына, контейнердартан туох баар таһаҕаһын хостоон, атын суудунаҕа тиэйиэхтэрэ, — диэн кини эттэ.

Баржалаах суудунаҕа 3324 туонна араас таһаҕас баар. Ол иһигэр, 32 контейнерга 796 туонна бородуукта, тутуу матырыйаала, комбикуорма баар. Билиҥҥитэ Өлүөхүмэ улууһугар бородуукта тиийбэт буолуутун кыһалҕата суох.

Бу быһылааны «Госморречнадзор» бэрэбиэркэлии сылдьар, ол түмүгэ от ыйын саҥатыгар тахсыаҕа.