Суукка иһигэр Дьокуускайга икки улахан суол саахала буолла

Ааспыт сууккаҕа Саха сиригэр үс буруйу оҥоруу бэлиэтэммитин туһунан СӨ Борокуратуурата иһитиннэрэр.

Жатайга күргүйдээн туран эр киһиттэн каартатыттан 300 тыһ.солк. уорбуттар. Уорбаланааччыны быһаарбыттар.

Дьокуускайга «Тойота Премио» массыынаны уорбуттар. Итиэннэ киин куоракка наркотигынан эргиммиттэрэ биллибит.

Киһи өлүүлээх суол саахала бэлиэтэммэтэх. Тохсунньу 8 күнүгэр 16 чаас саҕана «Сатал» түөлбэ таһыгар алта массыына кыттыылаах суол саахала тахсыбыт. Быһылаан буолбут сириттэн түөрт ыйдаах оҕону уонна дьахтары балыыһаҕа киллэрбиттэр диэн ГАИ иһитиннэрэр.

Киин куоракка Сайсары күөл таһыгар өссө биир улахан суох саахала буолбут. Барыллаан быһаарбыттарынан, «Сузуки» массыына суоппара сатаан салайбакка суол утары балаһатыгар тахсыбыт уонна «Тойота Гранд Хайс» массыынаны кытта харсыспыт. Онтон «Хайс» «Тойота Платц» массыынаҕа тиийэн түспүт уонна оптуобуһу таарыйбыт.

Суукка иһигэр итирик туруктаах сэттэ суоппары туппуттар.