Суукка иһигэр икки ойуур баһаарын умуруордулар

Саха сиригэр суукка иһигэр 1,6 га уопсай иэннээх ойуур баһаара умуруорулунна.

Экология, айылҕаны туһаныы уонна ойуур хаһаайыстыбатын миниистирин солбуйааччы Андрей Коноплев этэринэн, космическай уонна авиационнай кэтээн көрүү түмүгэр ааспыт сууккаҕа 87 га иэннээх үс саҥа ойуур баһаара, 34 га иэннээх биир хонуу баһаара  булулунна. Умайыылар Нам, Ньурба, Өлүөхүмэ улуустарыгар тахсыбыттар.

Бэс ыйын 11 күнүнээҕи туругунан өрөспүүбүлүкэ сиригэр-уотугар Дьааҥы, Нам, Өлүөхүмэ, Томпо улуустарыгар 1325 га уопсай иэннээх биэс ойуур баһаара умайар. Нам улууһугар 34 га иэннээх хонуу баһаарын умуллара сылдьаллар. 102 киһи, 8 тиэхиньикэ үлэлииллэр, диэн иһитиннэрэр Ил Дархан, бырабыыталыстыба пресс-сулууспата.