Суукка иһигэр түөрт ойуур баһаарын умуруордулар

Саха сиригэр биир суукка иһигэр 70,6 га уопсай иэннээх түөрт уот баһаарын умуруордулар. СӨ Суһал ыстаабын иһитиннэриитинэн, аны алта саҥа көрдүгэн баара бэлиэтэннэ.

Билигин 4 281 гектар уопсай иэннээх 8 ойуур баһаара баар: биэс — Дьааҥы улууһугар, үс — Эбээн Бытантай улууска. Уоту бохсууга ойуур баһаарын 130 исписэлииһэ уонна 5 анал тиэхиньикэ үлэлииллэр.

Саха сиригэр баһаар турар кутталлаах кэмэ саҕаланыаҕыттан 55 ойуур уонна 135 ландшафтнай баһаар бэлиэтэннэ. Бу баһаардар соҕотох төрүөттэриттэн киһи дьалаҕайа буолар. Ордук тарҕаммыт төрүөт — көҥүлэ суох сири өртөөһүн, маннык элбэх түбэлтэ Дьааҥы уонна Эбээн Бытантай улуустарыгар таҕыста. Миэстэтигэр кэтээн көрөр уорганнар исписэлиистэрэ үлэлииллэр, буруйдаахтар эппиэтинэскэ тардыллаллар.

Дьааҥы улууһугар ыксаллаах быһыы-майгы эрэсиимэ олохтоммута. Ону таһынан баһаары утары охсуһуу эрэсиимэ киллэриллэн, тыаҕа сылдьыы бобуллар.