Суукка иһигэр үс ойуур баһаара умуруорулунна

Ааспыт сууккаҕа Саха сиригэр 11,5 га уопсай иэннээх үс ойуур баһаарын Үөһээ Бүлүү, Мииринэй, Өлүөхүмэ улуустарыгар умуруордулар.

От ыйын 23 күнүгэр экология, айылҕаны туһаныы уонна ойуур хаһаайыстыбатын миниистирин солбуйааччы Андрей Коноплев иһитиннэрбитинэн, суукка саҕаланыытыгар өрөспүүбүлүкэ сиригэр-уотугар уопсайа 3 575,7 га иэннээх 13 ойуур баһаара баар. Олору умуруорарга 356 киһи уонна 16 тиэхиньикэ үлэлиир. Былырыын баччаларга 658,9 тыһ.га сиргэ 76 баһаар баара.

Бэс ыйын 5 күнүттэн Саха сиригэр баһаары утары оһуобай эрэһиим биллэриллэн турар. Ону кытта территориальнай баһаары утары оһуобай эрэһиимнэр Дьааҥы, Өлүөхүмэ, Чурапчы, Эбээн Бытантай улуустарыгар, Жатайга киллэриллибиттэрэ. От ыйын 20 күнүттэн ойуурга ыксаллаах быһыы-майгы эрэһиимэ Сунтаар улууһугар киирдэ, диэн иһитиннэрэр Ил Дархан, бырабыыталыстыба пресс-сулууспата.