Суукка устата иккис сир хамсааһына Саха сирин соҕуруу өттүгэр буолла

Саха сирин соҕуруу өттүгэр суукка устата иккис 4,5 магнитудалаах сир хамсааһына бэлиэтэннэ.

Алтынньы 7 күнүгэр сарсыарда өрөспүүбүлүкэ Амур уобалаһын кытары кыраныыссатыгар регистрацияланна. Бу туһунан ЯСИА-ҕа РАН Геофизическай сулууспатын Саха сиринээҕи филиалын дириэктэрэ Сергей Шибаев иһитиннэрдэ.

Учуонай иһитиннэрэринэн, сир хамсааһынын төрдө «Өлүөхүмэ» тимир суол ыстаансыйатын оройуонугар 10 км дириҥҥэ сытар. Күүһэ МСК-64 шкалатынан 5-6 балл буолла.

Санатан эттэххэ, бэҕэһээ, алтынньы 6 күнүгэр, Нерюнгри оройуонун Чульман бөһүөлэгиттэн 34 км чугас хотугулуу-илин диэкки сир хамсааһына бэлиэтэммитэ.

Чульман бөһүөлэгиттэн чугас сир хамсааһына бэлиэтэннэ