Сууккаҕа буруйу оҥоруу аҕыс түбэлтэтэ бэлиэтэннэ

Ааспыт сууккаҕа өрөспүүбүлүкэҕэ буруйу оҥоруу 8 түбэлтэтэ тахсыбыта бэлиэтэннэ диэн СӨ Борокуратуурата иһитиннэрэр.

Мииринэй куоракка 1974 с.т. киһини өлөрбүтэр, буруйу оҥорууга уорбаланааччы тутуллубут.

Дьокуускай куоракка уоруу тахсыбытын туһунан үҥсүү киирбит, массыына көлүөһэтэ уонна диискэтэ, бэнсиининэн барар генератор, суотабай төлөпүөн уонна баан каартата уоруллубут.

Өрөспүүбүлүкэ киин куоратыгар тырааныспары итирик туруктаах ыыта сылдьан үс киһи тутуллубут.

Суукка иһигэр 3 техногеннай баһаар тахсыбыт, өлбүт-сүппүт уонна эчэйбит киһи суох.

Киһи өлүүлээх, эчэйиилээх суол-тырааныспар быһылаана бэлиэтэммэтэх.