Сунтаар уола Арассыыйа Дьоруойа наҕараадаҕа түһэрилиннэ

Аҕа дойду көмүскээччитин күнүгэр бэртээхэй сонун кэллэ. Анал байыаннай дьайыы кыттыылааҕа Николай Николаев 14 бааһырбыт байыас олоҕун өрүһүйэн, кыргыһыы хонуутуттан быыһаабыт. Ону таһынан, икки күн устата соҕотоҕун тирэх пууну тутан сыппыт.

Бу туһунан Сунтаар улууһун дьаһалтатын телеграм-ханаала иһитиннэрэр.

Николай Васильевич Николаев Элгээйиттэн төрүттээх. Анал байыаннай дьайыыга хантараак баттаһан барбыта. Дьоруойдуу быһыытын иһин Арассыыйа Дьоруойа үрдүк наҕараадаҕа  түһэрилиннэ. Кулун тутар 1 күнүгэр наҕараадаҕа дьаһала тахсыаҕа. Онон Сунтаар улууһа үһүс дьоруойданар.

Санаттахха, Саха сириттэн дойдуга 10 Арассыыйа Дьоруойа баар.