Суут бириистэптэрэ кыһыл оҕо итирик дьону кытта сытарын булбуттар

Кулун тутар 12 күнүгэр Дьокуускайга суут бириистэбэ-толорооччу уонна алимены ирдииргэ дознаватель рейдэҕэ сылдьыбыттар. Кинилэр Красильников уулуссатыгар турар дьиэттэн кыһыл оҕо итирик эр дьону уонна дьахталлары кытта сытарын булбуттар. Бу туһунан биэдэмистибэ пресс-сулууспата иһитиннэрэр.

Кыбартыыра аана аһаҕас турар, ол иһигэр бу дьон улахан итирик, бэл суут бириистэптэрин иннилэригэр «бэттэх» кэлбэтэхтэр.

Тута полициялары ыҥырбыттар. Кэлин быһаарыллыбытынан, бу кыыс оҕо кулун тутар 2 күнүгэр саҥа төрөөбүт эбит. Оттон дьоно кинини төрүүр дьиэттэн таһаараат, тута арыгылаан саҕалаабыттар.

Билигин оҕону ПДН үлэһиттэрэ ылан, дьиэ кэргэҥҥэ көмө буолар кииҥҥэ быстах кэмҥэ аҕалбыттар.