Дьиэлэнэр бырааптарын суут төннөрдө

Кэбээйи оройуоннааҕы суутугар олорор дьиэни бас билээччилэр үҥсүү түһэрдилэр. 

Кинилэр олорор дьиэлэригэр 1/2 өлүүскэтин бас билэр хаһаайыттар буолалларын ыйбыттар. 2012 сыллаахха дьиэҕэ баһаар буолбут, онтон 2024 с. дьиэлэрэ өссө 2015 сыллаахха саахалланар туруктааҕынан көтүрүллүөхтээҕин туһунан билбиттэр. Эбийиэк баай-дуол кадастровай учуотуттан уһуллубут, көтүрүллүбүт, ол оннугар саҥа элбэх кыбартыыралаах дьиэ тутулла турар. Олорор дьиэ хаһаайыттара буолалларын быһыытынан, дьаһалта кинилэргэ сири муниципальнай наадаҕа былдьаан ылбытын туһунан туох да биллэриини, сөбүлэһиини ыыппатах.

Суут мунньаҕар эппиэттээччи бэрэстэбиитэлэ үҥсүү ирдэбилин билиннэ. Суут быһаарыытынан, мөккүөрдээх дьиэ баар дьиэтэ «2013-2017 сылларга дьону саахалланар туруктаах дьиэттэн көһөрүү» өрөспүүбүлүкэтээҕи сыаллаах бырагыраамаҕа киирэр, ону СӨ Бырабыыталыстыбатын 2013 сыл бэс ыйын 11 күнүнээҕи 193 №-дээх уурааҕынан бигэргэппит. Олорор дьиэ бырагыраамаҕа киирбит  буоллаҕына, дьиэ хаһаайыттара дьиэлэнэр бырааптарын туһанан хайдах хааччыллалларын талар бырааптаахтар. Ол курдук, хаһаайыттар бэйэлэрин бас билиилэрин оннугар олорор дьиэни атыылаһар эбэтэр атын тэҥ сыаналаах олорор дьиэни биэрэллэрин ирдиир бырааптаахтар.

Ол эбэтэр олохтоох салайыныы уоргана РФ Олох-дьаһах кодексатын 32 ыстатыйатыгар сөп түбэһиннэрэн муниципальнай наадаҕа ылыы бэрээдэгин тутуспатах. Көтүрүллүбүт олорор дьиэ оннугар атын дьиэ бэриллибэтэх, сыанатыгар тэҥнээх компенсация көрүллүбэтэх.

Суут олохтоох салайыныы уорганнарын тугу да гымматахтарын, ирдэһээччилэр баайдарын-дуолларын ылан баран, көтүрүллүбүт дьиэлэригэр тэҥнээҕи биэрбэтэхтэрин эбэтэр сөптөөх харчынан төлүүр бырааптарын билиммэтэхтэрин сокуон ирдэбиллэригэр сөп түбэспэт диэн ыйбыт.

Суут кэмигэр ирдэһээччилэр бас билэр олорор дьиэлэрэ, эппиэттээччи административнай дьайыыларын түмүгэр, кинилэр бас билиилэриттэн сөптөөх сыаната  төлөммөккө былдьаммыт.

СӨ Кэбээйи оройуоннааҕы суута, эппиэттээччи бэрэстэбиитэлин быһаарыытын истэн уонна бэриллибит дакаастабыллары үөрэтэн баран, ирдэһиини бигэргэттэ уонна эппиэттээччигэ көтүрүллүбүт дьиэлэрин оннугар ирдэһээччилэргэ үллэстиилээх бас билиилэригэр олохтоммут санитарнай-тиэхиньиичэскэй ирдэбиллэргэ эппиэттиир толору хааччыллыылаах дьиэни биэрэллэригэр эбээһинэстээтэ.

Суут быһаарыыта сокуоннай күүһүгэр киирэ илик.

Суут бу быһаарыыта РФ Төрүт Сокуонунан мэктиэлэммит дьон олорор дьиэҕэ бырааптарын тутуһууну, суут быһаарыытыттан ураты ким да баайыттан-дуолуттан матар кыаҕа суоҕун  тоһоҕолоон көрдөрөр. Ону тэҥэ олохтоох салайыныы уорганнара саахалланар туруктаах дьиэттэн дьону көһөрүүгэ сыһыаннаах процедуралары сөптөөхтүк олоххо киллэрэллэригэр эппиэтинэстээхтэрин эмиэ көрдөрөр, диэн иһитиннэрэр СӨ сууттарын холбоһуктаах пресс-сулууспалара.