Суут эр киһини сокуоннайа суох ылбыт учаастагы босхолуурга модьуйда

Сир учаастагын сорох сирин көҥүлэ суох баһылаабыт ыаллыы олорор эр киһи босхолуурун туһунан ирдииргэ суут көрүүтүгэр Ленскэй куорат олохтооҕо дьахтар сайабылыанньа суруйбут.

Сир учаастагын бас билээччи буоларын быһыытынан, хаһаайка кадастровай үлэни ыытыы кэмигэр кыраныыссатын таһынан, учаастагын сорох сирин ыаллыы олорор эр киһи ылбытын быһаарбыт. Эр киһи ыскылаакка сыһыары олбуор туппут уонна тимир контейнеры туруорбут.

Бу иннинэ дьахтар сир учаастагын босхолуур туһунан көрдөһөн холоммут да, эр киһи дьахтар этиитин ылымматах. Онон дьахтар дьыаланы суут көрүүтүгэр ыыппыт.

Ленскэй оройуонун суута ирдэбили ылынна уонна сир учаастагын босхолуурга, олбуорун көтүрэргэ модьуйда. Суут быһаарыыта сокуоннай күүһүгэр киирэ илик, диэн СӨ Сууттарын холбоһуктаах пресс-сулууспата иһитиннэрэр.