Суут тыа сирин дьахталларын диэки буолла

Липецкэй уобаласка биир ХЭУо үлэлиир 9 дьахтар нэдиэлэҕэ 36 чаас оннугар 40 чаас үлэлээтибит диэн оройуон борокуратууратыгар ирдэбил түһэрбиттэр.

Суут РФ Үлэ кодексатын 263.1 ыстатыйатыгар олоҕуран, үлэ биэрээччини нуорманы таһынан дьахталлары үлэлэппитин иһин эбии төлөбүрү уонна моральнай хоромньуну төлүүрүн эбээһинэстээбит.

Онон бастакы кассационнай суут тыа сиригэр үлэлиир дьахталларга улахан суолталаах мэктиэни бигэргэттэ: кинилэр үлэлэрин нэдиэлэтэ 36 чаастан тахсыа суохтаах. Онтон таҕыстаҕына — эбии үлэнэн ааҕыллан, үрдэтиллибит кээмэйинэн төлөнүөхтээх, диэн “Российскай газета” суруйар.

Суут этэринэн, хампаанньа тугунан дьарыктанара буолбакка, ханна баара суолталаах. Ол аата юридическай докумуонунан тыа сиригэр тэриллибит буолла да, тугунан дьарыктанарыттан тутулуга суох бу сокуону тутуһуохтаах. Бу сууттаспыт дьахталлар туох үлэһиттэр эбит диэтэххэ, лабаратыарыйа химигэ, каадыр отделын үлэһитэ, тулалыыр эйгэни харыстыыр инженер, кылгатан эттэххэ, тыа хаһаайыстыбатын кытта быһаччы сибээһэ суох дуоһунастар эбит.

Ол аата туох диэн буоларый?

Тыа сирин дьахталларыгар үлэ нэдиэлэтэ — 36 чаастаах. Онон бээтинсэҕэ эбиэт кэнниттэн үлэлээһин, нуорманы таһынан үлэҕэ киирсэр. Төлөбүрэ: бастакы икки чаас кырата балтараа кээмэйинэн, онтон уһаатаҕына икки төгүлүнэн ааҕыллыахтаах.

Харчы оннугар эбии сынньалаҥы талыахха сөп.

Үлэ биэрээччи бу быраабылалары кэстэҕинэ, үлэ инспекциятыгар, борокуратуураҕа эбэтэр суукка үҥсүөххэ сөп.