Сууттаммыт киһиттэн 2,3 мөл.солк. санавиация ороскуотун ирдииллэр

Саха сиринээҕи тырааныспар борокуруора сууттаммыт киһи 2,3 мөл.солк. төлөөтүн диэн суукка сайабылыанньа суруйбут. Бу киһи буруйунан эмсэҕэлээччини санавиациянан эвакуациялаабыттар диэн Саха сирин сууттарын пресс-сулууспата иһитиннэрэр.

«Уус Маайа оройуоннааҕы суудугар олохтоох киһиттэн 2 315 248 солк. 68 кэп. ирдэнэрин туһунан сайабылыанньа киирбит. Бу эмсэҕэлээччини санитарнай-авиационнай эвакуациялааһын төлөбүрэ», — диэн иһитиннэриигэ суруллар.

Сайабылыанньаҕа сурулларынан, эмсэҕэлээччи саанан ытыллан санавиция бөртөлүөтүнэн эвакуацяламмыт. Кинини эппиэттээччи саанан ыппыт диэн суукка дакаастаммыт. Ол иһин киниттэн бөртөлүөт ороскуотун ирдээбиттэр.

Сайабылыанньаны көрөллөр, гражданскай дьыала тэриллибит диэн суут чуолкайдаабыт.