Сууттана сылдьыбыт киһи каартаттан харчы уорбут

Арассыыйа ИДьМ Ньурба оройуонунааҕы дьуһуурунай чааһыгар эр киһи баан каартатыттан 12000 солкуобайы устубуттарын туһунан үҥсүү түһэрбит.

Холуобунай ирдэбил үлэһиттэрэ уорбаланааччыны булбуттар. Бу 36 саастаах урут уоран сууттаммыт киһи эбит.
Хомойуох иһин, барытыгар арыгы буруйдаах буолбут. Эмсэҕэлээччи бу киһини дьиэтигэр арыгы иһээри ыҥырбыт. Ыалдьыт дьиэлээх хаһаайын утуйбутун кэннэ баанын каартатын сойбоппут. Өссө ол киһи пин-кодун кытта билэр эбит. Онтон уоруйах биир нэдиэлэ куоракка баран каарта харчытынан туһаммыт. Биллэн турар, арыгы, ас атыыласпыт. Оройуоҥҥа төннөн кэлэн баран, били киһитигэр ыалдьыттаабыта буола сылдьан биллибэтинэн каартаны ылбыт сиригэр уурбут.
Арассыыйа Федерациятын Холуобунай кодексын 158 ыстатыйатын 3 ч. «Уоруу» холуобунай дьыала көбүтүлүннэ. Онон буруйдаах 6 сылга көҥүлэ быһыллыан сөп.

ИДьМ Саха Өрөспүүбүлүкэтигэр пресс-сулууспата