Суутунан баһаары умуруорууга уулуссаҕа турар массыына алдьаммытын ким төлүөхтээҕин быһаардылар

Дьокуускай куорат суутугар эр киһи сайабалыанньа суруйбут. Ол курдук, эр киһи быһаарыытынан баһаар кэмигэр баһаарынайдар уоту умуруорууга 9 этээс көрүдүөрүн түннүгүн алдьаппыттар. Түмүгэр өстүөкүлэ тааһа түһэн, парковкаҕа турар «Toyota Premio» маассынаны алдьаппыт. Онон эр киһи хоромньу сууматын толуйарга ирдэспит.

Баһаар тахсыбыт кыбартыыра хаһаайката хоромньуну төлүүртэн аккаастаммыт. Ол күн кыбартыыра иһигэр итирик туруктаах эр киһи баара биллибит. Уот тахсыбыт төрүөтэ — билиитэни сыыһа туттуу диэн быһаарыллыбыт. Ол курдук, баһаар тахсар күнүгэр кыбартыыраҕа дьахтар төрөппүт уола олорбута биллибит. Суут дьахтар ирдэбилинэн салайар хампаанньа уонна массыына бас билээччитэ бэйэлэрэ буруйдаахтарын туһунан этиини ылымматах. Суоппар тырааныспары бобуулаах сиргэ туруорбатах.

Суут быһаарыытын кыбартыыра бас билээччи дьахтартан «АЦОК «Интеллект» ХЭУо сыаналаабыт 72 628 солк. суумалаах хоромньуну толуйарга уураахтаата. Дьыала түмүгүн астыммакка, дьахтар үрдүкү инстанцияҕа үҥсүү түһэрбит. Ол эрээри, СӨ Үрдүкү суута үҥсүүнү ылымматах, суут быһаарыыта оннунан хаалла, диэн СӨ Үрдүкү суутун пресс-сулууспата суруйар.