Суутунан дьахтартан дьаһалта былдьаабыт кыбартыыратын төнүннэрдилэр

Уус-Маайа улууһун олохтооҕо 2014 сыллаахха ийэтиттэн нэһилиэстибэнэн ылбыт дьиэтигэр быраабын суутунан көмүскүүрүгэр тиийбит.

Дьахтар 2021 сыл олунньутугар диэри үс хостоох кыбартыыраҕа учуокка турбутун уонна төлөбүрүн төлүү олорбутун үрдүнэн, Уус-Маайа бөһүөлэгин дьаһалтата кыбартыыраны хаһаайына суох хаалбыт баайынан-дуолунан аахпыт. Бу туһунан Үрдүкү суутун пресс-сулууспата суруйар.

2023 сыллаахха бас билии быраабын суут нөҥүө билиннэрэ сатааһына ситиһиитэ суох түмүктэммит. Ол эрээри, балаҕан ыйыгар Саха сирин Үрдүкү суута бу быһаарыыны көтүрэн, эмсэҕэлээччи быраабын бигэргэппит. Бу кэмҥэ, апелляция түмүгүн күүппэккэ, 2023 сыл от ыйыгар бөһүөлэк дьаһалтата мөккүөрдээх кыбартыыраҕа атын киһилиин социальнай куортам дуогабарын түһэрсибит. Итининэн сибээстээн кыбартыыраны бас билээччи суукка хаттаан тиийэригэр күһэйбит.

Дьыаланы көрүү кэмигэр олохтоох дьаһалта дуогабар болдьоҕо бүтүөн иннинэ дьаһайбыта быһаарыллыбыт. Социальнай куортам дуогабарын түһэрсэр кэмнэригэр, бастакы инстанция суутун быһаарыыта сокуоннай күүһүгэр киирэ илик эбит. Дьаһалта саахалланар дьиэттэн көһөрүү бырагырааматынан кыбартыыраҕа саҥа куортамнааччыны киллэрэн, эбийиэк юридическэй статуһа мөккүөрдээх эрээри, киниэхэ дьиэни болдьоҕо суох бас билиигэ биэрбит.

Уус-Маайа оройуонун суута  эмсэҕэлээччи ирдэбилин толору толорбут. Социальнай куортам дуогабара күүһэ суоҕунан билиниллибит, оттон куортамнааччы уонна кини дьиэ кэргэнэ көһөрүллүөх буолбуттар. Суут ону таһынан бөһүөлэк дьаһалтатыттан дьахтар туһатыгар суут ороскуотун толуйуу быһыытынан 2500 солк. ирдээтэ.

Дьаһалта бэрэстэбиитэллэрэ быһаарыыны сөбүлэспэккэ, апелляция үҥсүүтүн биэрбиттэр. Ол эрээри, СӨ Үрдүкү суутун гражданскай дьыалаларга Судебнай коллегията оройуон суутун быһаарыытын уларыппакка оннунан хаалларда. Быһаарыы сокуоннай күүһүгэр киирбит.