Маҕаһыыҥҥа халтарыйан охтубут дьахтарга хоромньу төлөнүөҕэ

Ааспыт сыл алтынньытыгар Нерюнгри олохтооҕо куорат биир маҕаһыыныгар киирэн иһэн халтарыйан, муостаҕа охтон түһэн, хаҥас илиитин уҥуоҕун тоһуппут. Ылыллыбыт эчэйииттэн сылтаан үлэҕэ тахсыбатах, больничнай астарарга күһэллибит уонна 2024 сыл ахсынньы ортотугар диэри дьиэтигэр эмтэммит.

Эчэйиини ылбытын кэннэ, дьахтар маҕаһыын үлэһиттэриттэн сүтэрбит хамнаһын, эбии туппатах анал социальнай төлөбүрүн уонна моральнай хоромньу компенсациятын толуйалларыгар ирдэбиллээх тиийбит. Кини ирдэбилин көрүү түмүгүнэн, 50 000 солк. төлүүргэ этии киллэрбиттэр, ону дьахтар сөбүлэспэтэҕинэн Нерюнгри куораттааҕы суутугар быраабын көмүскүүргэ үҥсүү киллэрбит.

Дьахтар үҥсүүтүн маннык быһаарбыт — үлэҕэ тахсыбатаҕынан орто хамнаһын сүтэрбит, уопсайа 72 979 солк. 79 харчы хамнаһы туппатах, ону таһынан ый аайы бэриллэр 73 758 солк. бириэмийэтин уонна ый бүтүннүүтэ үлэлээтэххэ эрэ угуллар 13 000 солк. социальнай төлөбүрүн ылбатах. Ону сэргэ 281 752 солк. 44 харчы кээмэйдээх ыстараабы (неустойка) ирдиирин туһунан суруйбут.

Нерюнгри куоратын суута үҥсүүнү сорҕотун ылыммыт уонна буруйдаахтан сүтэриллибит хамнас 103 717 солк. 03 харчыны, хоромньу 27 690 солк., моральнай хоромньу компенсациятын 250 000 солк., ыстараап 190 703 солк. 52 харчыны уонна суукка ороскуот 48 560 солк. – уопсайа 620 670 солк. 55 харчыны толуйтарарга быһаарбыт. Ону таһынан буруйдаахтан 10 553 солк. судаарыстыбаннай пошлина ирдэммит.  Бу быһаарыыны сөбүлэспэккэ, буруйдаах СӨ Үрдүкү суутугар апелляционнай үҥсүү киллэрбит. Моральнай хоромньу компенсациятын кээмэйэ наһаа үрдэтиллибит диэн дакаастаспыт.

Апелляционнай инстанция суута буруйдаах этиилэрин ылымматах, тоҕо диэтэххэ, бастакы инстанция суутун сүтэриллибит хамнас кээмэйин туһунан түмүктэрэ сокуоннайдар, оттон моральнай хоромньу компенсациятын кээмэйэ дьахтар ылбыт этин-сиинин эчэйиитигэр уонна өй-санаа, сиэр-майгы өйдөбүллэригэр сөп түбэһэллэр. Ону таһынан, бастакы инстанция суута атыылаһааччы быраабын кэспитин иһин ыстараабы ирдээбит. Бастакы инстанция суутун быһаарыыта уларыйыыта суох хаалларыллыбыт уонна сокуоннай күүһүгэр киирбитин туһунан СӨ Үрдүкү Суутун пресс-сулууспата иһитиннэрэр.