Суутунан тутуу хампаанньатын дириэктэриттэн 62 мөл. солк. ирдэннэ

Өрөспүүбүлүкэҕэ улахан кээмэйдээх нолуок сокуонун кэһиини арыйдылар. Көбүтүллүбүт холуобунай дьыаланан суут «Приоритет» тутуу хампаанньатын кэммиэрчэскэй дириэктэриттэн 62 мөл. солк. тахсаны ирдиир туһунан ирдэбили бигэргэттэ, диэн СӨ Борокуратууратыгар иһитиннэрдилэр.

«Дьокуускай куорат борокуруора суукка ирдэбил сайабылыанньатын түһэрбит, ол толору кээмэйинэн толоруллубут. «Приоритет» ХЭТ кэммиэрчэскэй дириэктэриттэн РФ бүддьүөтүн дохуотугар 62 334 186 солк. кээмэйдээх материальнай хоромньу ирдэннэ», – диэн иһитиннэриигэ ыйыллар. Хампаанньа  дириэктэрэ  тэрилтэ барыһыттан нолуокка декларацияларыгар сымыйа сибидиэнньэлэри киллэрбитэ быһаарылынна. Бу бүддьүөккэ төлөнүөхтээх нолуок төлөбүрдэрин суумата аччыырыгар тиэрдибит. Суут быһаарыыта сокуоннай күүһүгэр киирэ илик.