Сувенирдар сыаналара төһөнүй?

«Азия оҕолоро» норуоттар икки ардыларынааҕы спортивнай оонньуулар кэмнэригэр киин куораппыт биллэ сэргэхсийдэ. Болуоссаттар аайы элбэх култуурунай тэрээһиннэр буолаллар. Оттон ыалдьыттарга, олохтоохторго анаан, ахсыс төгүлүн ыытыллар «Азия оҕолорун» өйдөбүнньүк буолан хаалар сувенирдара бааллар дуо?

Болуоссаттарга, киин уулуссаларга суевнирдары атыылыыр туочукалар арыллыбыттар. Дьэ, манна туох-туох баарый? Сыаната төһөнүй?

Араас сувенир эгэлгэтин анаан оҥорбуттар эбит. Магниттартан саҕалаан — тэриэлкэлэри, уруучукалары, блокноттары, чаһылары, сапсыыкалары, көһүлүөктэри, куруускалары, чааскылары, бейсболкалары, футболкалары, былааттары, визитницалары, значоктары, брелоктары, пледтары, наклейкалары, чуораанчыктары, төлөпүөнү уурар олбохтору,  чорооннору, бэл, куопталары…

Сувенирдар бары «Азия оҕолорун» эмблемата, бэлиэлэрэ — Сайыына моҕотой уонна Сэлиичээн ойуулаахтар.

Ол эрээри, сыаната ыарахан соҕус дуу дии санаатым. Саамай чэпчэки магнит 200 солкуобайтан саҕалаан, 400 солкуобайга тиийэ баар. Уруучука сыаната — 160-200 солкуобай.

Футболка — 550-1200 солкуобай, плед — 1950 солкуобай, чаһы — 1400 солкуобай, бейсболка — 650 солкуобай, аккырыыкка — 200 солкуобай, брелок — 200-500 солкуобай, блокнот — 350- солкуобай, визитница — 980 солкуобай, чааскы — 600 солкуобай, о.д.а.

Сэлиичээн сымнаҕас оонньуур — 3300 солкуобай, эмблемалаах 5 солкуобайдаах манньыат — 800 солкуобай.

Онон, өйдөбүнньүк гынан илдьэ сылдьарга хаачыстыбатын көрөн, бэйэҕит талаҕыт. Сыл-хонук аастаҕын аайы, сувенир ордук күндүтүйэн, сыаната да ыараан иһиэҕэ. Холобур, билигин сүүрбэ сыллааҕы «Азия оҕолорун» сувенирдарын коллекционердарга эрэ буларыҥ буолуо.