Светлана Горюшинская миграннары үлэҕэ хааччахтыыр ыйаахха быһаарыы биэрдэ

Нэһилиэнньэ дьарыктаах буолуутун судаарыстыбаннай кэмитиэтин бэрэссэдээтэлэ Светлана Горюшинская Ил Дархан Айсен Николаев олунньу 29 күнүгэр миграннары сорох идэҕэ ылыыны хааччахтыыр ыйааҕын туһунан быһаарыы биэрдэ.

“Бу ыйаахха суруллубутунан патент ылан үлэлиир миграннар үлэ 32 хайысхатыгар наймыланаллара бобуллар.

Үлэ хайысхаларын испииһэгин идэлээх сойуустары кытта сүбэлэһэн эспиэрдэр сэбиэттэрэ сыл аайы чопчулуур”.

Бу этиллибиккэ эбэн Светлана Горюшинская быһаарар: “Ыйаах патент атыылаһан үлэлиир омук гражданнарыгар сыһыаннаах. Евразийскай экэниэмикэ сойууһун чилиэнэ дойдулар гражданнарыгар (Киргизия, Казахстан, Армения уонна Беларусь) бу хааччахтар сыһыана суохтар. Кинилэр Арассыыйа гражданнарын кытта үлэҕэ тэҥ бырааптаахтар”.