СВО бэтэрээнэ Ханты-Мансийскайга күрэхтэһиигэ кыттыа

Кулун тутар 12-18 күннэригэр Ханты-Мансийскайга успуорт кыһыҥҥы көрүҥнэригэр «Кубок Защитников Отечества» ыытыллар.

Күөн күрэскэ Арассыыйа 60 эрэгийиэниттэн 300-тэн тахса СВО бэтэрээнэ түмсүө диэн иһитиннэрэллэр.

Манна Алдан улууһуттан Дмитрий Берляков кыттыаҕа, Саха сирин чиэһин көмүскүө. Кини биатлоҥҥа (олорон эрэ күрэхтэһэллэр) уонна хайыһарга (олорон эрэ күрэхтэһэллэр) күрэхтэһэр.

Күөн күрэстэр «ЮграМегаСпорт» успуорт эбийиэктэригэр, «Хвойный Урман» ГК уонна муустаах дыбарыаска ыытыллаллар. Күрэхтэһиигэ уопсайа биэс көрүҥ киллэриллибит. Хайыһарынан сырсыы, биатлон, следж-хоккей, хайаттан хайыһардааһын уонна сноуборд.

«Кубок Защитников Отечества» кэлим физкультурнай тэрээһиннэр РФ успуорт министиэристибэтин, РФ Паралимпийскай кэмитиэтин, уо.д.а. өйөбүллэринэн «Аҕа дойдуну көмүскээччилэр» пуонда тэрийбит.

Бу иннинэ сайыҥҥы күрэхтэһиилэргэ СВО бэтэрээннэрэ остуол тенниһигэр, оҕунан ытыыга, буулдьанан ытыыга, пауэрлифтиҥҥэ уонна олорон эрэ волейболга күөн көрсүбүттэр.

Күөн күрэс кыттыылаахтарыгар экскурсиялар ыытыллаллар, сынньалаҥ бырагыраамалара бааллар.

Тэрээһин кулун тутар 13 күнүгэр 19:00 саҕаланар. Сиһилии бу туһунан: https://ugramegasport.ru/event/kubok-zashhitnikov-otechestva/ манна киирэн көрүөххүтүн сөп.

СӨ Ил Дарханын уонна Бырабыыталыстыбатын пресс-сулууспата