«СВОй бизнес» үөрэх бырайыагар байыаннай дьайыы бэтэрээнэ грант хаһаайынынан буолла

Саха сиригэр «СВОй бизнес» үөрэх бырайыага түмүктэннэ.  Урбаан сайдыытын пуондатыттан 200 тыһыынча солкуобай суумалаах сүрүн граны полимернай иһиттэри оҥоруу бырайыагын байыаннай дьайыы бэтэрээнэ Алексей Захаров ылла.

«Үөрэх күннэрэ олус таһаарыылаахтык аастылар. Манна ылбыт туһалаах билиибин иһин махтанабын. Грант ылбыппыттан уонна бэйэм санаабын олоххо киллэриэм диэн олус үөрэбин», – диэн байыаннай дьайыы кыттыылааҕа Алексей Захаров махтанна.

Бырагыраамма өссө икки кыттыылааҕа Урбаан, атыы-эргиэн уонна туризм министиэристибэтиттэн, «Мин биисинэһим» киинтэн уонна Саха сирин Урбаан сайдыытын пуондатыттан 100 тыһыынча солкуобай суумалаах анал граннары ыллылар.

Амма улууһуттан мас матырыйаалларын оҥорон таһаарыы бырайыагынан Александр Заровняев уонна Дьокуускайтан таһаҕас тиэйии бырайыагынан Андрей Шелковников буолаллар. «СВОй бизнес» үөрэх бырайыагар 21 киһи – өрөспүүбүлүкэ араас улуустарыттан уонна Дьокуускайтан сэрии бэтэрээннэрэ уонна байыаннай сулууспалаахтар дьиэ кэргэттэрин чилиэннэрэ кытыннылар. Бэс күн устата бырайыак кыттыылаахтарыгар ис хоһоонноох бырагыраама тэрилиннэ. Түмүктүүр тэрээһиҥҥэ бары сэртипикээттэри уонна бэлэхтэри ыллылар. Бырайыак «Мин биисинэһим»  киинин кытта бииргэ Урбаан, атыы-эргиэн уонна туризм министиэристибэтин, Саха сирин Урбаан сайдыытын пуондатын, КСП корпорациятын, «Биир ньыгыл Арассыыйа» баартыйа хамыыһыйатын, «Опора России» салаатын уонна «Аҕа дойдуну көмүскээччилэр» пуонда филиалын өйөбүлүнэн олоххо киирдэ.