Сыаганнаахха уонна Киэҥ Күөлгэ 4G мобильнай сибээс ыстаансыйатын тутуохтара

Быйыл Абый улууһугар Киэҥ Күөлгэ уонна Сыаганнаахха  4G суотабай сибээс ыстаансыйатын тутары былаанныыллар. Бу туһунан Бырабыыталыстыба отчуотугар этилиннэ.

«Улуус олохтоохторо интэриниэт, сибээс хаачыстыбатын хайдах тупсарар туһунан уруккуттан ыйыталлар. Билигин ити хайысхаҕа күүстээх үлэ бара турар. Абый улууһугар билигин 2G үлэлиир. Былырыын 100-500 дьонноох нэһилиэнньэҕэ көмөлөһөргө  «Устранение цифрового неравенства 2.0» федеральнай бырайыак иитинэн үс 4G суотабай сибээс ыстаансыйата тутуллубута. Итинник ыстаансыйалар Киэҥ Күөлгэ уонна Сыаганнаахха тутуллуохтара«, — диэн эттэ СӨ Бырабыыталыстыбатын Бэрэссэдээтэлин бастакы солбуйааччы Дмитрий Садовников.

Маны таһынан, олохтоохтор ВОЛС ситимин тутарга «Синергия Арктики» бырайыагы интэриэһиргээтилэр. Билигин манна РФ сыыппара сайдыытыгар министиэристибэтин кытары үп-харчы боппуруоһугар үлэ ыытыллар. Сөбүлэстэхтэринэ, СӨ Бырабыыталыстыбата Абый улууһугар ВОЛС холбуурга тэтимнээхтик ылсыа.

СӨ Ил Дарханын уонна Бырабыыталыстыбатын пресс-сулууспата