Сыбаатайга ойоҕун күнүүлээн саанан ытан өлөрбүт эр киһи буруйданна

Саха сиринээҕи Силиэстийэлиир кэмитиэтин  оройуоннар икки ардыларынааҕы Халыматааҕы силиэстийэлиир отдела  ойоҕун өлөрүүгэ буруйданар Сыбаатай сэлиэнньэтин 54 саастаах олохтооҕор тэриллибит холуобунай дьыаланы силиэстийэлээн бүтэрдэ, диэн Саха сиринээҕи Силиэстийэлиир кэмитиэтин пресс-сулууспата иһитиннэрэр.

Силиэстийэ чахчыларынан, бу сыл олунньутугар эр киһи арыгы иһэн баран, итирик туруктаах сылдьан, ойоҕун күнүүлээн иирсээн кэмигэр, дьыбааҥҥа сытар дьахтары «МР-161» саанан көхсүгэр ыппыт. Буруйу оҥорбутун кэннэ, буруйданааччы тугу гыммытын өйдөөн кэлэн, аймахтарыгар эрийэн буолбут быһылаан туһунан кэпсээбит, ону таһынан бэйэтигэр тиийинэр санаалааҕын эппит.

Аймахтара миэстэтигэр тиийэн кэлэннэр, дьахтар өлүгүн уонна илиитигэр саанан бааһырбыт эр киһини  булбуттар – кини бэйэтигэр тиийинэ сатаабыт. Киниэхэ олохтоох биэлсэр көмөлөспүт. Силиэстийэлэччилэр тустаах үлэлэри ыытаннар, дакаастыыр баазаны хомуйбуттар. Бигэргэтиллибит буруйдуур түмүктээх холуобунай дьыала суут көрүүтгэр ыытылынна.