СҮБЭҺИТ: Алтан төбө сибэккиттэн мүөт

Ньээм эбэтэр Алтан төбө сибэккитэн олус туһалаах уонна минньигэс барыанньа — атыннык мүөт оҥоһуллар.

Одуванчик — алтан от, алтан төбө, ньээм от, току-току ньээм-ньээм диэн дьон араастаан ааттыыр. Бу сибэкки Саха Сиригэр араас көрүҥэ киэҥник үүнэр, сайыны быһа сибэккилэнэр.

Мүөтү оҥорууга сибэккитин ыраас күн сарсыарда аҕыс чаастан тоҕус чааска диэри хомуйар табыгастаах. Бу мүөт үөс туолбутун таһаарарга, сөтөлгө, хойуу хаайтарыытыгар туттуллар.

Сайыҥҥы бастакы барыанньаны — мүөтү хайдах оҥоробутуй?

Састааба: Алтан төбө сибэккитэ — 300 устуука; Саахар — 1 кг; Уу — 2 ыстакаан; Лимоннай кислота — 0,5 ч.ньуоска эбэтэр лимон — 0,5 уст.

Сибэккилэри умнаһа суох хомуйабыт. Араҕас сибэккилэрин эрэ буһарарга бэлэмнээн ыраастыыбыт. Ууну уонна саахары булкуйан сироп оргутабыт. Оргуйбут сиропка ыраас, тымныы ууга сайҕаммыт сибэккилэрбитин кутабыт. 20 мүнүүтэ сиробу оргутабыт. 2-3 мүнүүтэнэн оргуйбутун кэннэ лимоннай кислота (нь.ньуоска аҥаара) эбэтэр лимон суогун эбэбит. Оргуйбут сиробу уоттан ылабыт уонна биир хонук хонноробут. Сарсыныгар сиробу маарыла эбэт кыракый сиитэнэн сиидэлиибит, сибэккилэри быраҕабыт. Ол кэннэ эмиэ кыра уокка 20 мүнүүтэ устата оргутан ылабыт. Ити кэннэ мүөт бэлэм буолбутунан ааҕыллар. Мүөт өҥө суох, дьэҥкир буолар, кыратык араҕас өҥнөнөр.