СҮБЭҺИТ: «Ассорти» запеканка астыыбыт

«Вкусная шкатулка рецептов»  ВКонтакте бөлөх ааптара, өрөспүүбүлүкэ биллиилээх фуд-блогера Ирина Дегтярева олус боростуой уонна түргэн «Ассорти» запеканка ырысыабын кытта үллэстэр. Бу бүлүүдэни халадьыылынньыкка туох баарынан оҥорорго табыгастаах.

Наада буолуоҕа: моркуоп аҥаара, помидор – 2 устуука, кабачок аҥаара, баклажан – икки өлүү, болгарскай биэрэс – чиэппэрэ, эриэппэ луук аҥаара, хортуоска.

• 1. Бастаан оҕуруот аһыттан рагу бэлэмниибит: бары састаабы булкуйан, кыратык буһарабыт.
• 2. Бэлэм буолбут рагуну духуопкаҕа угар формаҕа кутабыт.
• 3. Аспыт өссө минньигэс буоларын наадатыгар, үрдүгэр кырбастаммыт куурусса этин уурабыт. Туустуубут, хара биэрэс кутабыт.
• 4. Соуска анаан икки сымыыты, биир ыстакаан үүтү уонна теркаламмыт сыыры булкуйабыт.
• 5. Бу бэлэмнээбит кутуубутун рагу үрдүнэн кутабыт.
• 6. 190 кыраадыска диэри ититиллибит духуопкаҕа 30 мүнүүтэ устата уган буһарабыт.

Минньигэстик аһааҥ!