СҮБЭҺИТ: Атах таҥаһын сөпкө харыстыыбыт

Лаахтаах атах таҥаһын баатаны үүккэ илитэн баран ыраастаатахха, бэркэ кылабачыйар. Атах таҥаһа халтараан буоллаҕына, тилэҕэр лейкопластыры хас да кыра лоскуй гына кырыйан сыһыарыахха сөп.

Саҥа атыылаһыллыбыт тирии атах таҥаһын кириэминэн оҕунуохтанар. Тирии кириэми оборбутун кэннэ ордугун таҥаһынан сотуллар. Маннык хараллыбыт атах таҥаһа өр кэмҥэ сулууспалыыр.

Атах таҥаһа кафельга, линолеумҥа кыычыгырыыр буоллаҕына, аннын касторовай арыынан  оҕунуохтанар, ордугун тэрээпкэнэн сотуллар.

Сиигирбит атах таҥаһын куурдарга хаһыаты ыга симиллэр уонна сылаас сиргэ ууруллар. Замшаттан оҥоһуллубут атах таҥаһын паарга туттахха, кирэ түргэнник барар. Оттон олус киртийбит буоллаҕына, мыылалаах ууга нашатырканы эбэн сууйуллар.

Саха ыалын халандаарыттан, 2013 с.