СҮБЭҺИТ: Баттахпытын чөлгө хайдах түһэрэбит?

Сайын бэргэһэтэ суох аһаҕас күҥҥэ, тыалга сылдьыы түмүгэр баттах мөлтүүр. Бу мөлтөөбүтүн кыс устата биирдэ өйдөөн көрөбүт. Кини сайын ылбыт охсууларын күһүн, кыһын биллэрэр.

Баттахпытын чөлгө хайдах түһэрэбит? Баттах убааһынын, түһүүтүн, маҥхайыытын сүрүн биричиинэтинэн күн аһары күүскэ көрүүтэ буолар. Күн уота меланин диэн пигмени сиэн кэбиһэр. Ол түмүгэр баттах өҥө, туруга уларыйар.

Бастатан туран, уһун баттахтаахтар суһуоххут хайыта барбыт төбөлөрүн барытын кырыйаргыт наада. Оттон кылгас баттахтаахтар саатар биир см кырыйан саҥа баттах үүнэригэр көмөлөһөбүт. Маны сэргэ, күһүн хайаан да муораттан сөтүөлээн, хлордаах ууга суунан, сайыҥҥы быылы иҥэриммит куйахабытын ыраастыырбыт наадатын трихолог быраастар сүбэлииллэр. Ол туһуттан бэйэбитигэр сөптөөх пилиҥи булан, ыраастанарбыт наада. Бэйэҕит сатаан оҥостубат буоллаххытына, бу өҥөнү солуоннарга оҥотторор наада.

Иккиһинэн, баттахпытын иһиттэн эмтиибит. Ол туһуттан В бөлөх битэмиининэн эппитин-сииммитин хааччынабыт. Маны таһынан цинк, медь курдук битэмииннэр эбиискэлэһэллэр.

Үсүһүнэн, сайын кэнниттэн баттахха нэдиэлэ ахсын эмтээх мааскалары оҥостон бөҕөргөтөбүт.  Ол эрээри баттах мааската куйахаҕа сотуллубат. Доруоһалаах, сымыыттаах мааскалар олус көмөлөөхтөр. Ону сэргэ, тараахха болҕомто уурар наада. Сымнаҕас баттахтаах дьон сымнаҕас суокканан тарааналлара ордук. Тимир, быласымаас тараах баттахха куһаҕаннык дьайар. Онон мас тарааҕы талар ордук.