СҮБЭҺИТ: Бутугас астыыбыт…

Ыһыах бырааһынньыгын өссө биир үгэс буолбут аһа – бутугас. Сүөгэй уутугар бурдук кутан, отон сүмэтин эбэн буһарыллар убаҕас хааһы.

Былыр-былыргыттан үүт аска төрүт өбүгэлэрбит ураты ытыктабыллаахтык сыһыаннаһаллара уонна араас сиэргэ-туомҥа туһаналлара. Саха киэн туттуута уонна таптала – биэ үүтэ. Ол бу хотугу норуот биир сүрүн аһын – бутугас оҥоһуута буолар. Минньигэс сыттаах уонна тотоойу үрүҥ ас үс эрэ бородууктаттан 8-10 мүнүүтэ иһигэр оҥоһуллар. Эһиги эмиэ оҥорон көрүҥ.

Бүгүн бутугас судургу ырысыабынан үллэстэбит.

Туох нааданый:

• Сүөгэй уута (арыыта суох сүөгэй) – 900 г;
• Бурдук – 100 г;
• Уулаах отон – 100 г.

Астыыр ньыма:

• 1. Уулаах отонтон сүмэтин ыган ылыҥ.
• 2. Сүөгэй уутун көстүрүүлэҕэ кутан, билиитэҕэ ууруҥ. Оргуйуор диэри буһарыҥ.
• 3. Бурдугу сиидэлээн. Тохтоло суох булкуйа-булкуйа, бурдугу сыыйа кутуҥ. 5-7 мүнүүтэ буһарыҥ.
• 4. Үүттээх-бурдуктаах хааһыга отон сүмэтин кутуҥ. Оргутан таһааран баран, билиитэни араарыҥ.

Сүөгэй уутуттан оҥоһуллубут тотоойу ас бэлэм. Бутугаһы остуолга итиитигэр туспа ас быһыытынан уураллар. Минньигэстик аһааҥ!