СҮБЭҺИТ: Бүгүн киэһэ тугу буһарабыт?

Дьэ, хаһаайкалар күн аайы бу боппуруоһу быһаараллар. Үлэ кэннэ тиийэн, түргэнник тугу буһара охсон, оҕолорбун, кэргэммин аһатабын, тоторобун диэн ыал ийэлэрэ толкуйдууллар. Дьэ, бүгүн эһиэхэ көмөлөһүөхпүт, судургу, түргэн, тотоойу ас ырыссыаптарын кытта үллэстиэхпит.

 

Эт начыыннаах хортуоппуй

4-5 орто хортуоппуй, 2 сымыыт, 1 ост.нь. крахмал, 300 г эриллибит ынах, сибиинньэ этэ, 1 эриэппэ луук, 4 ост.нь, сүөгэй, 50 г ынах арыыта, 100 г сыыр, укуруоп, петрушка, хара биэрэс.

Хортуоппуй буспутун кэннэ, 2 сымыыты, 1 ост.нь крахмалы эбэн баран, илдьи сынньан, пюре оҥоробут. Амтанын тупсарар туһуттан, ынах арыытын кутуохха сөп.

Луугу ыһаарылыыбыт, үрдүгэр эриллибит эти, сүөгэйи  кутан, буһарабыт, туустуубут, биэрэстиибит.

Хортуоппуй пюретын кумааҕылаах боротумуоҥҥа 10 см кэтиттээх гына төгүрүччү, хаптаччы кутабыт. Салаппаан бакыакка кутан баран, сибэкки быһыылаах оҥордоххо, быһыытын тутар (крахмаллаах буолан). Үрдүгэр эттээх начыыны уурабыт, сүөгэйдиибит. 200 кыраадыс итийбит духуопкаҕа 30-40 мүнүүтэ буһарабыт. Буһуон иннинэ түөркэлэммит сыыры таммалатан баран, духуопкаҕа 5 мүн. туруора түһэбит. Укуруобунан киэргэтэбит.

Кутуу бөрүөк

Тиэстэтигэр: 1,5 ыстакаан кэпиир (эбэтэр, сүөгэй), 3 сымыыт, 1,5-2 ыстакаан бурдук, туус, суода. Начыыҥкатыгар: 150 г ынах, эбэтэр, куурусса этэ, 3 буспут сымыыт, 1 эриэппэ луук, 1 моркуоп.

Кэпииргэ суоданы кутан, 5 мүнүүтэ туруора түһэбит. Сымыыты, бурдугу, тууһу кутан, хойуу алаадьы тиэстэтин курдук, убаҕас тиэстэни оҥоробут. Тиэстэ тура түстүн.

Луугу, моркуобу уһун синньигэс гына кырбаан баран, арыыга ыһаарылыыбыт. Кыра гына быһыллыбыт эти эбэн, буһарабыт.

Буспут сымыыты түөрт муннуктуу, кыра гына кырбыыбыт.

20 см кэтиттээх төгүрүк иһиккэ бастаан тиэстэ аҥаарын кутабыт, онтон эттээх начыыҥкатын, сымыыты уурабыт, үрдүгэр хаалбыт тиэстэни кутабыт.

Сылыйбыт духуопкаҕа 180 кыраадыска 30-35 мүнүүтэ буһарабыт.