СҮБЭҺИТ: Быйылгы төрүөх ньирэйдэри хайдах иитэбит-көрөбүт?

— Быйылгы төрүөх ньирэйдэрдээх дьоҥҥо сүбэлээҥ эрэ.

СӨ Бэтэринээрийэ управлениетын Бэтэринээрийэ тэрээһиннэрин тэрийиигэ отделын сүрүн исписэлииһин э.т. М.В.Христофорова маннык сүбэлээтэ:

— Быйылгы төрүөх ньирэйдэргэ сөптөөх кэмигэр быһыы оҥотторуллуохтаах. Салгыы олоҕун тухары араас сыстыганнаах ыарыылартан, үөннэртэн, сүөһү туруга чөл буоларын туһугар оҥоһулла туруохтаах. Бу быраабыланы тутустахха, сүөһү туруга үчүгэй, ылыллар бородууксуйа куттала суох, төрүөх төрөлкөй буолар.

Ынаххыт төрөөтөҕүнэ бэтэринээри ыҥыран, туругун көрдөрөн,   хайаан даҕаны учуокка киллэттэрэн, анал нүөмэр ылан (маркирование) бииркэ туруоруллуохтаах. Атыыр ньирэй буоллаҕына, эрдэттэн кастрация уочаратыгар суруйтарыахха сөп.

Ол курдук, хайаан даҕаны оҥоһуллуохтаах быһыылар: ис ыарыытын (сальмонеллез), модьуун (трихофития), хааһырхас (Эмкар), сотуун (Сибирская язва). Ону таһынан бэтэринээр сүбэтинэн атын көстө сылдьыбыт ыарыылар утары быһыы оҥоһуллуон сөп.

Ханнык баҕарар быһыыны оҥотторуоҥ иннинэ ньирэйиҥ туругун манаан көрүөхтээххин, туруга чэгиэн буолара ирдэнэр.

Тэлгэһэҕэ сылдьар кыылларгытыгар (бостуук ыт, тулайах хаалбыт кулунчуктар, куоска) барыларыгар биир кэмнэ быты утары үөн  түһэрэр эмп туруортарар ордук. Кэлин хостоон бэйэ-бэйэлэрин үөн-быт сымыыттарынан сутуйбаттарын туһугар.