СҮБЭҺИТ: Бүрээттии омук бүлүүдэтэ – «Хиимэ»

Омук аайы бэйэтэ туспа, ураты, үйэлэри уҥуордаан кэлбит астаах-үөллээх. Бүгүн биһиги ааҕааччыларбытыгар бүрээт омук биир саамай биллэр уонна минньигэс бүлүүдэтин – ынах этиттэн оҥоһуллар хааннаах халбаһыыга маарынныыр «Хиимэ» ырысыабын таһаарабыт.

Дьиэ кэргэниҥ үөрэ-көтө, саҥаттан-саҥаны билэн, амсайан көрөрүгэр бу бүлүүдэ олус сөп түбэһиэ. Астыырга уустуга суох.

Туох нааданый: Ынах этэ (сыата, уҥуоҕа суох эт) – 850 гр., ынах ис сыата – 200 гр, оһоҕос (халбаһыы хаата) – төһө наадатынан, уу – 130 мл., эриэппэ луук – 100 гр. (1 улахан луук), бурдук – 15 гр. (биир остолубуой ньуоска кэриҥэ), туус, мэлиллибит хара биэрэс.

Хаатын бэлэмнээһин. Бастатан туран, халбаһыы хаатын, ол эбэтэр оһоҕоһу, үчүгэйдик бэлэмниэххэ наада. Ол иһин оһоҕоһу үчүгэйдик сууйабыт. Иһин кыһыйан ыраастаан баран,  тымныы ууга хаста да сайҕыыбыт. Ити кэннэ хаабыт бэлэм буолар.

Начыыҥкатын оҥоруу. Начыыҥкатыгар анаан сибиэһэй ынах этин уонна ис сыатын ылабыт. Эт эрийэр массыынаҕа иккиэннэрин бииргэ эрийэбит, үрдүгэр эриэппэ луугу эбэбит. Ону таһынан, ас бэлэмниир комбайны эмиэ туһаныахха сөп. Сүрүн ирдэбил – эриллибит маасса биир кэлим, хойуу буолуохтаах. Эт фаршыгар уубутун, инникиттэн сиидэлэммит бурдукпутун кутабыт уонна амсайан көрөн туустуубут.

Халбаһыыны оҥоруу уонна буһарыы. Бэлэм буолбут фаршы үчүгэйдик булкуйан баран, амсайан көрөн атын да тумалары эбиэххэ сөп. Ол кэннэ бэлэмнээбит оһоҕоспутун фаршынан ыга симэбит. Буһарар кэмҥэ иһин сүмэтэ тахсыбатын диэн, халбаһыыны хас 10-15 см буола-буола сабынан баайталыыбыт. Бэлэмнэниллибит халбаһыылары көстүрүүлэҕэ уган, үрдүгэр ыраас уу кутан, уокка уурабыт. Халбаһыы оргуйар ууга хаата тэстибэтин диэн, чаас аҥаарын кэриҥэ буһарабыт. Минньигэстик аһааҥ!