СҮБЭҺИТ: Дьахтар инфарктаары гыммытын хайдах быһаарабыт?

Инфаркт диэн сүрэх ыарыыта. Хомойуох иһин, сүрэх, тымыр ыарыыта эдэрсийэр, үгүс дьон инфаркт эрдэ биллэрбитин билбэккэ хаалан элбэх бириэмэни сүтэрэллэр. 

Инфаркт ыарыы эр дьоҥҥо уонна дьахтарга биллэрэр сибикитэ уратылаһар. Дьахтар сүрэҕин ыарыыта чуумпу буолан, үгүстэр болҕомто уурбакка хаалаллар… Бу туһунан дойду үрдүнэн сүрэх-тымыр быраастарын сүбэлэрин хомуйан бэлэмнээтибит.

Үгүстэр сүрэх ыарыыта түөскэ иннэнэн кэйиэлиир курдук буолар үһү диэнинэн аахайбаттар. Оттон сүрэх-тымыр ыарыыта биллэрбэккэ сылдьан киһини өлүүгэ да тиэрдиэн сөп. Эр дьоҥҥо инфаркт ыарыыга түөстэрэ күүскэ ыалдьар, баттыыр курдук буолар эбит. Оттон дьахтарга кыратык ыалдьан, кэйиэлээн ылан баран ааһан хаалыан сөп. Ол эрээри ардыгар эмискэ салгын тиийбэтин курдук турук буолуон сөп. Бу ордук сааһырбыт кэрэ аҥаардарга бэлиэтэнэр. Дьахталлар тымныйан ыарыйдыбыт дии саныыллар. Төбөлөрө ыалдьар, сэниэлэрэ суох буолар. Оттон сорохтор төрүөтэ суох хотуолуохтарын сөп, мэйиилэрэ эргийэр.

Саамай сүрүн болҕомто ууруллуохтаах төрүөттэрэ:

— көхсү хараҕа ыалдьыан сөп;

— сыҥаах, тиис ыалдьыан сөп;

— моойго ыарыы биллэрэр;

— хаҥас илии, сарын ыалдьар буолар;

— куртах үөһээтинэн ыалдьыан сөп. Ону үгүстэр оһоҕоспут ыарыйда дии саныыллар.

Онон маннык ыарыылары бэйэҕитигэр бэлиэтии көрдөххүтүнэ, тута бырааска көрдөрүнэ охсуҥ.