СҮБЭҺИТ: Бэс ыйыгар дөлүһүөн сибэккитин хомуйабыт

Сахабыт сиригэр өлгөмнүк үүнэр дөлүһүөн отонун, сэбирдэҕин, сибэккитин уонна силиһин норуот мэдиссиинэтигэр былыр-былыргыттан туһаналлар. Айылҕа оҥорбут эмтиэкэтэ доруобуйаҕа олус туһалааҕынан аатырар.

Итини таһынан дөлүһүөн сибэккилэрэ битэмиининэн тугунан да кэмнэммэт диэн норуот эмчиттэрэ суруйаллар. Эмтээх сибэккитин бэс ыйын саҥатыгар хомуйаллар, оттон сэбирдэҕин сайын устата хомуйан хатарыахха сөп.

Норуокка этэллэринэн, «дьиикэй роза» сибэккини ис уорган сүһүрбүтүгэр, тириини эмтииргэ тутталлар. Маны таһынан дөлүһүөн сэбирдэҕин тирии бааһыгар саба уураллар, оччоҕо баас оспутунан барар эбит. Силиһин үөс, бүөр, хабах тааһын суурайарга тутталлар.

Дизентерияҕа дөлүһүөн силиһин көөнньөрөн, оргутан иһэллэр. Дөлүһүөн отонуттан, сибэкки эминньэҕиттэн барыанньа, араас утах оҥороллор. Хатарыллыбыт дөлүһүөнү үлтү мэһийэн ураты үчүгэй сыттаах кофе курдук утах оҥорон иһиэххэ сөп.

Сибэккитин хомуйарбытыгар сэрэнэн кыптыыйынан эбэтэр быһаҕынан быһан ылабыт. Хомуллубут сибэккилэри тутатына хатара уурабыт. Хатарарбытыгар сибэккилэри 1 см халыҥнаах гына кумааҕыга тэлгээн ууруохха наада. Хатарыллыбыт сибэккилэри чэй оҥостон иһэбит.