СҮБЭҺИТ: Дьиэ өрөмүөнэ. Удамыр сыанаҕа хайдах оҥоруохха?

Үгүс дьон дьиэтин өрөмүөннүүрү, тупсарары сайын былаанныыр. Халлаан сылааһыгар дьиэни кырааскалааһын, обуой килиэйдээһин о.д.а., көрдөххө бытархай курдук эрээри, киһи бүддьүөтүгэр охсор уонна сыраны-сылбаны ылар үлэ үгүс. Биһиги сүбэлэрбит дьиэни судургутук  өрөмүөннүүргэ көмөлөһүөхтэрэ.

Дьиэ ис бараанын уларытыы

Бу боппуруос ордук кэрэ аҥаардары долгутар. Эр киһи булуон-талыан, сүгүөн-көтөҕүөн сөп. Оттон дьиэ ис бараанын ымпыгар-чымпыгар диэри тупсарыы, уларытыы туһунан кэрэ аҥаар эрэ толкуйдуур. Бастатан туран, саҕалыах иннинэ тугу уларытыаххын баҕараргын билиэхтээххин. Эркиннэр өҥнөрүн дуу эбэтэр миэбэли дуу. Хаһан баҕарар аҕыйах миэбэллээх, салгыннаах дьиэ киэҥ-куоҥ буолан көстөр. Ол туһугар туттуллубат мал-сал мунньуллуо суохтаах. Иккиһинэн, сүрүн оруолу муоста ыларын умнумаҥ. Сыаналаах миэбэл кэриэтэ кыбартыыра, дьиэ истиилигэр барсар өҥнөөх ламинаты, линолеуму талыы буолар. Биир тэҥ сырдык өҥнөөҕө ордук. Дьиэ ис бараанын сөптөөхтүк былааннанан туруоруллубут миэбэл быһаарар. Эркин сырдык, биир өҥнөөх буолуута сиппит-хоппут көрүҥү биэрэр. Кыараҕас дьиэҕэ ойуулаах обуой, хараҥа кырааска олох барсыбат. Уонна уоту сөптөөхтүк туһаныы улахан оруоллаах. Киирии аан, хостор, саала, куукуна барыта сырдык буолуохтаахтарын умнумаҥ.

Дьиэ дизайнын оҥорортон куттанымаҥ

Үгүстэр дьиэ дизайнын дьоҥҥо оҥорторортон сыаналаах буолуо диэн туттуналлар. Оттон үгүстэр бэйэлэрэ оҥорон холонортон куттаналлар. Бүддьүөтүн харыстыыр киһи аан бастаан дьиэтин былаанын туппутунан дизайнерга барыахтаах эбит. Бастаан сөптөөх былааны оҥостуу наада. Мин биир билэр кыыһым хаһан киэҥ дьиэҕэ көһөрүн күүтэн ыһыллан-тоҕуллан, ыскаап да атыыласпакка олорбутун билэбин. Сотору көһүөм диэн санаанан салайтара сылдьан, устунан оннук олоро үөрэнэн хаалбыта. Баҕа санаата туолан, саҥа киэҥ дьиэ атыыласпыта эрээри, аны саҥа миэбэл атыылаһарын күүтэн эмиэ оннук ыһыллан олорбута. Киһи тоҕоостоох түгэни кэтэһиэ суохтаах, тоҕоостоох түгэни киһи бэйэтэ оҥоруохтаах диэн мындыр сүбэ баар. Хайдах да усулуобуйаҕа олорон киһи дьиэтин оҥостуохтаах, тупсарыахтаах. Дьиэ дизайна — кини кэрэ эрэ көстүү буолбатах, бастатан туран, киһи табыгастаахтык олорор усулуобуйатын тэринии буолар. Олорорго дьиэҥ мала-сала, былаана барыта дьүөрэлэһиэхтээх.

Харчыны мунньабыт дуу, кирэдьиит ылабыт дуу?

Оҥорбут, тупсарбыт эрэ киһи диэн буолбакка, дьиҥ сыаллаах-соруктаах хамсаннахха, киһи кыайар дьыалата. Барытын биирдэ оҥорор кыайтарбат буоллаҕына, былааҥҥын ыспакка, кыраттан саҕалыыр ордук. Туох оҥоһуллуохтааҕын чопчу испииһэктиигин. Аан бастаан саамай суолталааҕы оҥорор наада. Өрөмүөҥҥэ үгүс харчы оҥорор дьоҥҥо хамнаска барарын умнума. Онон харчыгын харыстыыр буоллаххына, өрөмүөнү бэйэҥ оҥорорго үөрэн. Бастакынан, үлэни түһүмэхтэргэ араарар наада. Манна туох оҥоһуллуохтааҕын уонна уларыйыахтааҕын суруй. Иккиһинэн, туох атыылаһыллыахтааҕын, сууматын ыйар наада. Үсүһүнэн, тугу бэйэҥ, тугу дьоҥҥо оҥортороргун ый. Испииһэк бүтүүтэ уопсай суума ыйыллар, онтон билигин төһөтүн ууран биэрэр кыахтааххын аттарынаҕын. Өрөмүөн оҥорторууга харчы сатаан мунньуллубат, кирэдьиит бырыһыана улахан буоллаҕына, кыра-кыратык саҕалаа. Холобур, дьиэҥ эркиннэрэ эргэрбит, өҥө-дьүһүнэ барбыт буоллаҕына, шпаклевка, кырааска, үлэлииргэ туттар тэрил сөп буолар. Бу үлэни киһи үлэһиттэргэ соҥнообокко, бэйэтэ оҥорор кыахтаах. Дьиэ эркинэ кырааска кэнниттэн тута сырдыы, тупса түһэр. Киһи тугу сатыырын бэйэтэ оҥоро сатыахтаах. Маннык дьаһаныы ороскуота аҕыйах буолар.

Миэбэл, түннүк, муоста…

Өрөмүөҥҥэ ороскуоттаах дьыаланан түннүк, хостор ааннарын, муостаны уларытыы буолар. Онон барытын уларытыаххытын баҕарар буоллаххытына, саамай наадалааҕыттан саҕалыыр ордук. Ол курдук, уһун уонна тымныы кыһыннаахпытын учуоттаан, аан бастаан кырыарар, мууһурар түннүк уларыйара ордук. Иккиһинэн муоста, үсүһүнэн миэбэл, онтон ааннар. Өрөмүөн оҥосторго тренд буолбут муоданы батыспакка, классическай истиили тутуһар ордук. Кэлин уларытарга, тупсарарга үп-харчы өттүнэн барыстаах буолар.

Өрөмүөнү саҕалыах иннинэ

Истиилгин талбыт, ороскуоккун суоттаабыт буоллаххына, өрөмүөнү саҕалыахха син. Мэһэйдиир туһата суох малы-салы, кэтиллибэт таҥаһы-сабы тоҕоостоох түгэни туһанан быраҕар ордук. Биирдии хоһунан кыра-кыралаан үлэни саҕалыыр барыстаах, дьиэ-уот да ыһыллыбат. Урукку муоданан хастыы да хаттыгастаах, уоттаах-күөстээх потолок муодаттан тахсыбыта. Истиэнэни кырааскалыыр судургу эрээри, оллур-боллурун көннөрүү уустук. Маны сатаабат буоллахха, бу хара үлэтин дьоҥҥо оҥорторуохха сөп, харчыны ороскуоттаабат сыалтан, оҥоһуллубут истиэнэни киһи бэйэтэ кырааскалыыр.

Эргэ миэбэли быраҕарга ыксаама

Ардыгар хаһаайкалар саҥа миэбэл атыылаһа охсоору, быраҕарга ыксыыллар. Манна сыта-тура толкуйдуур наада. Куукуна ыскаабын, хос туумбаларын, долбуурдары, оннооҕор сымнаҕас миэбэли киһи саҥардар кыахтаах. Билигин кырааска, ол-бу тэрил элбэх кэмигэр киһи тугу баҕарар уларытар, тупсарар кыахтаах. Холобур, куукунаҥ эргэрбит көрүҥнээх, санааҕар ханньары баран, лааҕа сүтэн, өҥө-дьүһүнэ бүппүт курдук. Итиннэ ыскаап ааннарын иэччэхтэрин кэмигэр чиҥэтии эмиэ суолтаны ылар. Арай ыскаап ааннарын сөбүлээбэккин, кырааскалыаххын баҕарбаккын. Оччотугар бүтүннүү куукунаны буолбакка, ааннарын эрэ уларытыахха сөп. Атыылаһардааҕар быдан чэпчэки буолан тахсар. Маны таһынан, ыскааптар ааннарын тутааҕа да уларыйдаҕына, киһи хараҕар тута быраҕыллар буолар. Бу хостор ааннарыгар эмиэ сыһыаннаах. Маны таһынан, өрөмүөн матырыйаалын бастакы маҕаһыынтан атыылаһарга тиэтэйимэ. Үөрэтэн, ханна чэпчэтии буола турарын билэн-көрөн баран атыыластахха, барыһырыахха сөп.

Дьиэҕэ ханнык истиил ороскуота суоҕуй?

Саамай удамыр уонна элбэх харчыны ирдээбэт өрөмүөн “минимализм” буолар. Манна скандинавскай истиил ордук барсар. Элбэх миэбэли ирдээбэт. Киэҥ-куоҥ көрүҥү үөскэтэр. Маны таһынан, холодильникка элбэх магнит, ол-бу сыһыарыллыбыт кумааҕылар эмиэ ыһыллаҕас көрүҥү биэрэллэр. Онон дьиэ эркиннэригэр, ыскааптарга, холодильникка араас ойуу-бичик сыһыарар, киэргэтэр соччото суох. Дьиэ истиилигэр хартыыналар, лаампалар, чүмэчилэр, ону кытта түннүк сабыыта улахан оруоллаах. Дьыбаан, кириэһилэ сабыыта эмиэ суолталаах. Өҥнөрү дьүөрэлээһин дьиэ истиилин биллэрдик тупсарар.

Былааннаныы, харчыны мунньунуу

Өрөмүөнү былааннааһын күһүҥҥүттэн саҕаланыахтаах, сайыҥҥа диэри кыралаан харчы мунньунар наада. Сыта-тура дьиэҕэр тугу уларытыаххын баҕараргын ырыҥалыыгын, былаанныыгын. Оттон бу сайын өрөмүөнү кыайбатаххытына, санаарҕаамаҥ, кэлэр сайыҥҥа диэри бириэмэ баар.