СҮБЭҺИТ: Дьиэҕэ ханнык үүнээйилэри олордор табыгастааҕый?

Дьиэни эбэтэр кыбартыыраны өрөмүөн кэнниттэн дьиҥнээх оранжереяҕа кубулутан, хойуу сибэккилээх үүнээйинэн киэргэтэр кыах идэтийбит флористарга эрэ баар буолбатах. Хас биирдии үүнээйи ураты энергиятын бэлэхтиир, сылаас уонна уоскулаҥ эйгэни олохсутарга көмөлөһөр. Бүгүн биһиги дьиэ иһигэр үүннэрэргэ хас да табыгастаах үүнээйилэри хомуйан таһаарабыт.

Фикус

Үрдүк, хоп-хойуу, бөдөҥ сэбирдэхтэрдээх буолан, ханнык баҕарар хоско муостаҕа ууруллар улахан горсуокка олус кэрэтик көстөр. Фикус көрүҥэ – бу соҕотох үтүө өрүтэ буолбатах. Үүнээйи бэйэтигэр араас токсиннары — бензолу уонна фенолу күүскэ иҥэринэр. Фикус сүһүрүүнү тохтотор, онон норуот мэдиссиинэтигэр эмиэ туһаныллар. Ыалдьыт хоһугар эбэтэр саалаҕа уурарга олус табыгастаах, тоҕо диэтэххэ элбэх миэстэни ылар.

Фикус +15… +27 кыраадыска диэри салгын температуратыгар бэркэ үүнэр уонна сырдыгы сөбүлүүр. Кыһын сэбирдэхтэрин кэмиттэн кэмигэр уунан ыстараллар эбэтэр инчэҕэй таҥаһынан сотоллор. Нэдиэлэҕэ иккитэ көрөн уу кутуллуохтаах.

Болҕойуҥ! Фикус дьиэ кыылларыгар аллергияны көбүтүөн сөп. Онон ыттар/куоскалар сэбирдэхтэрин сиэбэттэрин гына  уурар ордук. Фикуһу «харчы маһа» диэн ааттыыллар. Үгүс дьон бу үүнээйи дьиэҕэ аайга-дуолга тиэрдэр диэн итэҕэйэр. Көрүүгэ-истиигэ сүрүнэ —  сэбирдэхтэрин ыраастык тутуу.

Бегония

Бегония сүүһүнэн көрүҥүттэн дьиэҕэ ханныгын баҕарар талан ылыаххытын сөп. Улахан сибэкки дьөрбөлөрө өҥүн арааһынан үөрдэллэр. Уратыта диэн бегония сылы эргиччи сибэккилэниэн сөп.

Бу сибэкки утуйар ууну көннөрөр, үрдүк хаан баттааһынын намтатар диэн итэҕэл баар – онон утуйар хоско олордорго табыгастаах. Бегония сибэкки +15..+24 С кыраадыс сылааска сибэккилиир уонна салгыны ыраастыыр. Кылгас кэмҥэ курааны чэпчэкитик тулуйар, ол эрээри 10 чаастаах сырдыкка наадыйар. Үүнээйи эһигини өр кэмҥэ чаҕылхай сибэккитинэн үөрдэрин уонна туһалыырын туһугар, буора кураанах буолбатын ситиһиҥ.

Алоэ

Өскөтүн туһалаах дьиэ үүнээйилэрин тала сылдьар буоллаххытына, испииһэккитигэр алоэны киллэриҥ. Үүнээйи сүмэһинэ – дьиҥнээх эмтээх эликсир. Итиигэ буһуу кэннэ бааһы оһорор, истэххэ төбө ыарыытыгар, неврозка, гастрикка көмөлөһөр. Бу киэргэл эттээх сэбирдэхтэрин сүмэһинэ бактериялары өлөрөр дьайыылаах. Алоэ сэппэрээктэрэ улахан көрүүнү-харайыыны эрэйбэттэр. Уон хонукка иккитэ эрэ уу кутуохха сөп. Үүнээйини күлүккэ ууруллуо суохтаах – сырдык сиргэ туруорар ордук.

«Тещин язык»

Салгыны ыраастыыр өссө биир улахан көрүүнү-харайыыны эрэйбэт үүнээйи – кэрэ көстүүлээх сансевиерия. Уһун, икки өҥнөөх сэбирдэхтэрэ олус тупсаҕайдык көстөллөр. Бу үүнээйи салгыны формальдегидтан уонна атын буортулаах холбоһуктартан ыраастыыр, онтукаларын оннугар кислородунан байытар. Сансевиерия уустук көрүүнү эрэйбэт – дьыл кэмиттэн уонна курааныттан көрөн, ыйга бииртэн түөркэ диэри уу кутуохха сөп. Дьиэ үүнээйитэ сырдыгы да, күлүгү да «сөбүлүүр», ол эрээри +10С кыраадыстан аллараа температураҕа өлүөн сөп.

Салгыыта тахсыаҕа.