СҮБЭҺИТ: Этэрбэһи хайдах чөлүгэр түһэрэбит?

Бу соторутааҕыта тыс этэрбэһи хайдах чөлүгэр түһэрэр туһунан видеону көрөн аһарбытым.

Онно эдэр дьахтар маннык сүбэлээтэ:

— Кыстык кэлэн, сайын ууран турбут тыс этэрбэскитин дьааһыктан эҥин таһаардыгыт. Биллэн турар, ууруллан сыппыт буолан, быһыыта уларыйбыт курдук. Ону чөлүгэр түһэрэр туһугар этэрбэскит иһигэр кумааҕыта, эргэ таҥаста  симиҥ. Онтон урукку быһыытын ылбытын кэннэ миискэҕэ иһит сууйар фейрини кутуҥ. Уонна ол суурадаһыҥҥытынан губканы кыратык илитэн баран (инчэҕэй буолуо суохтаах) этэрбэскитин сууйар курдук сотуҥ. Ол кэнниттэн эргэ чулкуну, холгуокканы этэрбэскит билэтиттэн үөһэттэн саҕалаан тилэҕэр диэри тиирэ тардыҥ. Уонна ууран кэбиһиҥ. Оччоҕуна кыратык сиигирбитэ сотору кэминэн кууран хаалыаҕа. Оттон этэрбэскит сабыс саҥа көрүҥнэниэ.

Хаартыска: быыстапка-дьаарбаҥка түгэниттэн (архыып)