СҮБЭҺИТ: Гречкаттан бүлүүдэлэр

Гречка киһи доруобуйатыгар олус туһалаах, ол гынан баран киһи барыта сөбүлээбэт. Манна гречканы атыннык астаатахха, хас биирдии хаһаайка сандалы остуолун сүрүн бүлүүдэтэ буолуон сөп. Доруобуйаҕытын тупсарыаххытын баҕарар буоллаххытына, гречканы астаан. Бүгүн араас ырысыаптары кытта үллэстэбит.

Оҕуруот аһа уонна гречка

Туох нааданый:

гречка — 1,5 ыстакаан;
уу — 3 ыстакаан;
өҥнөөх хаппыыста — 150 г;
брокколи  — 150 г;
моркуоп — 1 уст.;
оливковай арыы — 2 ост.нь.;
сыыр — 100 г;
туус, тума.

Хаппыыстаны, брокколины, моркуобу кубиктыҥы кырбыыбыт. Оҕуруот аһын оливковай арыыга кураанах гречканы кытары ыһаарылыыбыт, онтон оргуйбут уу кутабыт уонна 20 мүнүүтэ устата аргыый буһарабыт. Туус, тума кутабыт уонна сыыр таммалатан баран остуолга уурабыт.

Тэллэйдээх гречка

Гречканы тэллэйи кытта астыыр олус минньигэс. Бу бүлүүдэни ордук туой иһиттэргэ буһаран бэлэмнээтэххэ олус табыллар.

Туох нааданый:

гречка — 2 ыстакаан;
уу — 4 ыстакаан;
тэллэй — 500 г;
эриэппэ луук — 1 уст.;
моркуоп — 1 уст.;
мас арыыта — 1 ост.нь.;
туус, хара биэрэс, тума.

Тэллэйи ууга сайҕыыбыт, хайдах баҕарар быһыылаах кырбастыыбыт, моркуобу, эриэппэ луугу кубиктыҥы кырбастаа кутабыт. Тэллэйи эрдэттэн 10-15 мүнүүтэ устата ууга оргутан ылыҥ, онтон оҕуруот аһын кытта 5 мүнүүтэ устата ыһаарылаан. Оҕуруот аһын уонна тэллэйи гречка үрдүгэр ууран, туус, биэрэс, ууну кутуҥ, 40 мүнүүтэ устата буһарыҥ. Гречка дьахтарга олус туһалаах — тириини, баттаҕы уонна тыҥырах туругун тупсарар.

Гречкаттан плов

Гречкаттан плов ырысыабын арааһа элбэх. Мантан биирин талан ыллахха.

Туох нааданый:

гречка — 1 ыстакаан;
уу — 2 ыстакаан;
куурусса этэ — 350 г;
болгарскай биэрэс — 1 уст.;
ынах арыыта — 2 ост.нь.;
туус, биэрэ, тума.

Куурусса этин ууга сайҕыыбыт уонна кырбастаан баран, ынах арыытыгар ыһаарылаан ылабыт. 5 мүнүүтэнэн хобордооххо ууну кутуҥ, хаппахтаан баран уута уолуор диэри оргутуҥ. Кэлин кууруссаҕа болгарскай биэрэс эбэн биэриҥ уонна орто уокка буһарыҥ. Хобордооххо гречка кутабыт, оргуйбут уу кутабыт, туустааҥ, хаппаҕын сабан баран, орто уокка оргутуҥ. Уоту аччатан баран, чаас аҥаара устата кыра уокка оргутабыт.

Минньигэстик аһааҥ!