СҮБЭҺИТ: Хаар төбө тэллэйи хайдах маринуйдуубут?

Диетолог Дарья Русакова кэпсииринэн, хаар төбө тэллэй (грузди) B бөлөх битэмииннэринэн (B1, B2 уонна B5) баай. Ону таһынан бу тэллэйдэргэ D битэмиин уонна магний, калий, фосфор, натрий курдук минераллар бааллар. Итини таһынан, үүнээйиттэн оҥоһуллубут белоктаах.

«100 грамм хаар төбө тэллэйгэ 0,75 грамм кэриҥэ белок баар. Ол да буоллар, тэллэйгэ баар белок киһи организмыгар куһаҕаннык буһарын уонна иҥэрин учуоттуохха наада. Киһи куртаҕар ситэ буспат», — диэн исписэлиис бэлиэтээтэ.

Русакова бэлиэтииринэн, хаар төбө тэллэйи сыыһа туттан сиэтэххэ, доруобуйаҕа кутталлаах буолуон сөп. Кини этэринэн, бу тэллэйдэр састааптарыгар ураты сүлүһүннээх буолуон сөптөөх эттиктэр бааллар, онон кинилэри бэлэмниир технологияны кытаанахтык тутуһуохха наада. Оттон тууһаммыт уонна маринадтаммыт тэллэй тууһа элбэх. Онон бүөрэ ыалдьар эбэтэр хаанын баттааһына үрдүк дьоҥҥо маннык аһы сииртэн туттуналлара сүбэлэнэр.

Диетолог Дарья Русакова кэпсииринэн, хаар төбө тэллэйи аска туттуох иннинэ, тымныы ууга уган туруоруллуохтаах. Иккиттэн үс күҥҥэ диэри тэллэйи илитэр ордук. Ууга турбутун кэннэ тэллэйдэри итиигэ буһараллар, онтон эрэ кэлин тууһууллар эбэтэр маринуйдууллар.

Састааба:

• 1 кг хаар төбө тэллэй;
• 2 лиитирэ уу;
• 6 улахан ньуоска туус;
• 3–5 туорах хара биэриэх;
• 2 чосунуок өлүүтэ;
• 1 укуруоп зонтига.

Тэллэйдэри көстүрүүлэҕэ угуҥ. Тууһу биир лиитирэ ууга суурайыҥ, онтон ол туустаах уугутунан тэллэйдэри саба кутуҥ. Орто уокка оргутуҥ уонна биэс мүнүүтэ устата буһарыҥ. Онтон тэллэй уутун сүүрдүҥ уонна толору сойутуҥ. Атын көстүрүүлэҕэ хаалбыт ууну оргутуҥ, онтон хос температуратыгар диэри сойутуҥ. Бэлэмнэммит бааҥка түгэҕэр биэрэһи уонна чосунуогу ууруҥ, онтон үрдүгэр тэллэйдэри уонна укуруопта угуҥ. Бааҥкаҕа туустаах ууну кутуҥ уонна түүнү быһа туруоруҥ. Наада буоллаҕына, сарсыарда уу кутан бааҥка иһин толоруҥ. Онтон бааҥканы хаппахтаан харайарга халадьыылынньыкка угуҥ. Тэллэй икки-үс ыйынан сиэнэргэ бэлэм буолар.