СҮБЭҺИТ: Хаарыйар оттон салааттар

Хаарыйар от (крапива) олус битэмииннээх, эмтээх үүнээйи. Аһылыкка туһаныахха сөбүн туһунан билэҕит дуо?

Күөх лууктаах салаат

50 г хаарыйар от, 20 г күөх луук, 25 г кииһилэ, 10 г үүнээйи арыыта, туус.

Хаарыйар от саҥа үүнэн эрэ сэбирдэхтэрин ылан, сууйан, кырбаан баран, кырбаммыт күөх луугу кутан, мас лаппаахынан илдьирийиэр, сүмэһинэ тахсыар диэри булкуйабыт. Кырбаммыт кииһилэни кутан баран, арыылыыбыт, туустуубут. Салаат  бэлэм!

Сымыыттаах салаат

100 г хаарыйар от, 1 сымыыт, 10 г үүнээйи арыыта, туус.

хаарыйар от сууйуллубут сэбирдэхтэрин оргуйа турар итии ууга кутан, өссө 5 мүнүүтэ буһарабыт. Сиидэлээн ылан баран, кыра гына кырбыыбыт. Буспут сымыыты кырбаан кутабыт. Үүнээйи арыытын оннугар салаат туматын туһаныахха сөп. Маннык тума бэйэтэ специялаах, ураты амтаннаах буолар. Туустуубут, булкуйабыт. Эриэхэлэри, сиэмэлэри эбиэххэ сөп, оччоҕо өссө тупсар.

Кууруссалаах салаат

Хаарыйар от саҥа үүммүт сэбирдэхтэрэ, 100 г куурусса этэ, 1 уст. болгарскай биэрэс, 3 уст. сымыыт, 1 уст. помидор, кириэннээх хартыыһа, туус.

Бородуукталары барытын кырбаан баран, булкуйабыт, кириэннээх хартыыһанан тумалыыбыт. Олус тотоойу уонна туһалаах салаат буолар, оҥоһуллара да судургу, түргэн.

Бохсурҕаннаах салаат

40 г хаарыйар от, 4 г бохсурҕан сэбирдэҕэ, 10 г эриэппэ луук, 8 г петрушка, эбэтэр укроп, 15 г үүнеээйи арыыта, 1 сымыыт.

Саҥа үүммүт «эдэр» хаарыйар оту сууйан баран, кыра гына кырбыыбыт. Бохсурҕан сэбирдэхтэрин сууан баран, туустаах ууга (1 л ууга 20 г тууһу кутабыт) 20 мүнүүтэ сытыарабыт, онтон кураанах салпыакканан сотон, куурдабыт. Бохсурҕан оннугар ньээм-ньээм сэбирдэхтэрин кутуохха сөп, эмиэ олус туһалаах, битэмииннээх үүнээйи, үөскэ эмтээх.

Буспут сымыыты кырбаан кутан баран, луугу, петрушканы эбэбит, үүнээйи арыытын кутабыт, туустуубут. Подсолнечник арыытын буолбакка, бүтүннүү ыгыллыбыт, рафинированнайа суох арыылары туһаныахха сөп.

«Домашняя энциклопедия. Питание — здоровье».