СҮБЭҺИТ: Хаһаайыстыбаннай мыыла туһата

Хаһаайыстыбаннай мыыла туһата  элбэх эбит. Аҥардас таҥас сууйарга эрэ буолбакка, хаһаайыстыбаҕа барытыгар туһаныахха сөп эбит.

Хаһаайыстыбаннай мыыла үксүгэр натуральнай састааптаах буолар. Дьиҥнээх сыа, арыы сыалаах кислоталарын натриевай туустарыттан, солохтон, натрий хлоридыттан (туус), глицеринтэн оҥороллор.

• Хоһоҕото суох хойуу, чэгиэн баттахтаныаххын баҕарар буоллаххына, бастаан сомпуунунан, онтон хаһаайыстыбаннай мыыланан суун. Суунан баран, 1 хомуос ууга 1 ч.нь. уксуус кутан, онон сайҕан. Бу ньыма ордук сыалаах баттахха барсар.
• Тумуулаан эрэбин дии санаатаххына, хаһаайыстыбаннай мыыланы кыратык ууга суурайан, лосьон оҥорон, баата томпуону онно илитэн баран, муннуҥ иһин сотун.
• Күн уота тириигин сиэбит буоллаҕына, хаһаайыстыбаннай мыыланан сотун.
• Испити, эбэтэр, көҕөрүүнү суох оҥорорго эмиэ хаһаайыстыбаннай мыыланы ууга суурайан баран, тутун. Маннык уунан күҥҥэ 2-3 сотун.
• Тиҥилэх хайыта барбыт буоллаҕына, 2 л ууга 1 ч.нь. суоданы уонна 1 ост.нь. түөркэлэммит хаһаайыстыбаннай мыыланы суурайан, суун.
• Тиис суунар суокканы дезинфекциялыырга хаһаайыстыбаннай мыыланан биһэн баран, түүн устата туруоруллар.
• Инньэ, булавка, испииссэ дьэбиннирбит буоллаҕына, хаһаайыстыбаннай мыылаҕа батары ас. Оччоҕо ырааһырар.

«Кыыс Куо, Далбар Хотун энциклопедията» кинигэттэн.