СҮБЭҺИТ: Хайаҕы хайдах оҥоруохха?

Хайах — өбүгэлэрбит сөбүлээн сиир үрүҥ астара. Аҕыйах сыалаах, киһи этэ-хаана түргэнник иҥэринэр. Бу аһыытыҥы арыы ас буһарар уорганнарга туһалаах. Урут хайах элбэх буолара, билигин дьон сиэбэт буолла. Ол эрээри, бэйэҕит оҥостон, сиэххитин сөп, оҥоһуллара судургу.

500 г ынах арыыта, 250 мл сүөгэй уута, эбэтэр, суорат (кэпиир), кыра бырыһыаннаах үүт.

Арыыны халадыынньыктан таһааран, туруоран эрэ сымнаҕас буолуор диэри ириэрэбит. Үүтү (сүөгэй уутун, эбэтэр, кэпиири) эбэбит уонна ытыгынан күүскэ ытыйабыт. Хайах үллэр, көпсөркөй буолар. Араас отону, сиэниллэр от силиһин эбиэххэ сөп.

Хайаҕы халадыынньыкка уган, сойутабыт.  Сииргэ табыгастаах буоллун, кыра-кыра куһуоктары оҥортоон тоҥоруохха сөп. Тоҥмут хайаҕы ириэрдэххэ, туох да буолбат. Тоҥорон баран, биир ый устата эрэ харайыахха сөп.

Лэппиэскэни кытта сииргэ оһуобай!

«Туһалаах уонна минньигэс үрүҥ ас» кинигэттэн.